“Taxa partisipasaun menus ida ne'e falla husi Sekretáridu Téknika Administrasaun Eleisaun (STAE) ninian no mós governu nian halo, kuaze 300.000 votante la tuir eleisaun. Tanba ne’e, ba segundu ronde, governu presiza hadi’a,” dehan nia, iha Palasiu Prezidensiál Bairru-Pité, horisehik.
Tuir nia, povu matetenk ona hodi vota, maibé presiza matenek liután.
Entretantu, Diretór Ezekutivu Luta Hamutuk, José Alves da Costa hateten, eleitór barak la vota tanba inkapasidade STAE nian.
"Eleitór barak la vota ha'u hanoin ida loos duni katak inkapasidade Diretór Jerál STAE, ne'e hatudu momoos karik tanba nia mak ladun hatene, maibé ha'u fiar katak dala-ruma asas kesengajaan. Ita hatene katak mobilizasaun ba iha eleisaun ne'e tempu limitadu tebetebes," dehan nia.
Nia hatutan, halo lei tun-sa'e atu oinsá bele harii sentru paralelu, ikus mai ema barak labele ezerse sira-nia dever sidadania ninian hodi kontribui ba eleisaun, ne'e faillansu boot. Seluk mak bulletin votu ne'ebé hetan kiak uluk ona hatudu iha fatin-fatin.
Hanesan iha Suai, Vikeke, Oekusi, no Same, ne'e hatudu momoos katak Diretór Jerál STAE laiha kapasidade hodi kontrola material sensitivu sira hanesan ne'e.
"Iha erru barak la halimar ne'ebé akontese iha prosesu eleisaun ne'e, liuliu tékniku ninian hanesan sentru votasaun invez sira ba ne'e halo observasaun ba lampu sira ne'e halo nusa, presiza lampu ida ne'ebé naroman. Ha'u ba haree iha Flexia lampu kiik oan tebes ema leno tan lampada mak foin bele hetan kuak ne'e iha ne'ebé, loloos labele akontese maibé bele akontese, signifika Diretór Jerál rasik laiha kapasidade," hatete nia.
Tanba ne'e, prefere di'ak liu rejigna-aan, see nia lakohi rejigna-aan di'ak liu troka de'it, karik Primeiru Ministru iha hanoin atu troka karik husu ba ministru ne'ebé kompetente atu haree ba iha asuntu ne'e, tanba nia laiha kapasidade atu kontrolla sasán sensitivu sira iha eleisaun.
Nia haktuir, bele mós provokasaun oinsá atu bele kria instabilidade bele akontese, hanesan foin daudauk akontese ema balun to’o hemu tua lanu mak tama fali sentru votasaun, tama iha kontajen halo barullu, ne'e signifika laiha kapasidade oinsá atu organiza, mobiliza asegura ba eleisaun ne'e ho pás no estabilidade.
Tanba sira laiha liña koordenasaun ne'ebé di'ak, balun aranka ona ba foho, maibé iha ne'ebá la permite nia vota entaun hakarak ka lakohi nia labele ezerse, balun iha Dili hanoin katak nia naran tama tiha ona ikus mai nia naran laiha ne'e faillansu boot.
Nia esplika, buat ne'e kiik oan de'it loloos ne'e ba sidadaun sira ne'ebé aprovadu atu vota iha sentru paralelu minimu semana ida antes tanba taka 3 Marsu sei semana rua entaun verifika hotu kedas halo reajustamentu dadus iha data base mak públika iha fatin públiku.
Hanesan eskola, hospital fatin hein karreta, merkadu katak sidadaun sira ne'e mak sei aprovadu hetan votasaun iha sentru paralelu, maibé ne'e ema la hatene laiha komunikasaun faillansu liu tan mak UNTL deklara ninian katak labele vota sentru paralelu entaun ema paniku sira mós hakarak ezerse hasa'e ona nia osan hala'o ba tiha foho ba la vota tan.
