Órgaun Eleitorál Falla, Votu 12.706 Nuladu

By Domingos Gomes Marsu 23, 2022 298
Eleitores sira ezerse sira nia direitu votu. Foto:INDEPENDENTE. Eleitores sira ezerse sira nia direitu votu. Foto:INDEPENDENTE.

DILI: Konsellu Nasionál Joventude Timor-Leste (CNJTL) konsidera servisu órgaun eleitorál husi Komisaun Nasionál Eleisaun (CNE) ho Sekretariadu Tékniku Administrasaun Eleitorál (STAE), laiha seriedade halo edukasaun sivika ba sidadaun sira, tanba ne’e rezultadu votasaun akontese votu nulu barak no numeru 12.706.

Presidente CNJTL, Maria Dadi Magno hateten, eleisaun presidensial hatudu rezultadu servisu husi órgaun eleitorál husi CNE ho STAE failla iha edukasaun sivika ba sidadaun sira, tanba votu nulu barak.

“Falla boot husi ita-nia órgaun eleitorál, tanba sira menus halo sosializasaun kona-ba edukasaun sivika ba sidadaun sira, ikus mai akontese rezultadu kontajen hatudu votu nulu barak,” dehan nia, iha Palasiu Prezidensiál, Bairru-Pité, horisehik.

Nia dehan, órgaun eleitorál tenke foti resposabilidade, tanba sidadaun balun partisipa iha eleisaun prezidensiál, maibe rezultadu votu nulu barak sira rasik seidauk iha esperensia vota.

“Ita-nia sidadaun sira barak la hatene vota, tanba iha failla duni iha edukasuan sivika, ita husu atu iha elisaun segunda volta mai ne’e órgaun eleitorál halo edukasaun sivika,” tenik nia.

Iha parte seluk, Ministru Administrasaun Estatal (MAE), Miguel Pereira de Carvalho hateten, kompetensia órgaun eleitora sira hanesan STAE nia papel mak halo edukasaun ba votante hodi vota ho lolos no CNE rasik mos halo edukasuan sivika para sidadaun hodi uza sira-nia direitu iha loron eleisaun bele tuir vota.

Tanba ne’e, situasuan balun akontese sosializasaun edukasasun sivika ba sidadun sira, maibe realidade iha eleisaun sidadaun barak vota sala, ida ne’e hatudu edukasuan sivika ne’e ladún efetivu.

“Ida ne’e presiza duni ita-nia órgaun eleitorál sira atu reforsa tan halo edukasaun sívika ba sidadaun sira atu bele tuir vota ho loloos,” tenik nia.

Entretantu, tuir dadus STAE elitor ne’ebé resensiadu ona tuir elisaun prezidensial hamutuk 859.613, maibe iha taxa partisipasaun eleitor hamutuk 664.106 no sira ne’ebé la partisipa 195.507.

Tanba ne’e, iha krafikasaun votu ba eleisaun presidensial tinan 2022- 2027 ne’ebé realiza ona iha 19 Marsu 2022, rezultadu votu validu 647.172, votu branku 3.676, votu nulu 12.706, reklamadu 437, rejeitadu 60 no abandonadu 55.

Rate this item
(0 votes)
Last modified on Kuarta, 23 Marsu 2022 20:47

Independente Digital TV