Tuir dadus husi STAE, kandidatu PR númeru 14, José Ramos Horta sai kandidatu ne’ebé hetan votus barak liu 301,481 ka 46.58%, iha númeru tuir mai mak Francisco Guterres Lú Olo ho votus 143,408 ka 22,16%, Armanda Berta dos Santos ho votus 56,289 ka 8,70 %, Lere Anan Timur ho votus 48,959 ka 7,57%, no Mariano Assanami Sabino ho votus 47,008 ka 7,26%.
Iha númeru neen to’o 10 okupa husi Anacleto Ferreira ho votus 13,059 ka 2,02%, Martinho Gusmão ho votus 8.485 ka 1,31%, Hermes da Rosa Correia Barros ho votus 7,958 ka 1,23% no Milena Pires ho votus 5,335 ka 0,82%.
Enkuantu kadidatu PR ne’ebé la konsege atinze votus rihun 5 mak Isabel Ferreira ho votus 4,165 ka 0,64%, Felisberto Araujo Duarte o votus 2,615 ka 0,40%, Constâncio Pinto ho votus 2,474 ka 0,38%, Rogério Lobato ho votus 2,028 ka 0,31%, Virgílio Guterres ho votus 1,685 ka 0,26%, Antero Bendito ho votus 1,531 ka 0,24% no Ângela Freitas ho votus 692 ka 0,11%.
Bazeia ba rezultadu ne’e, kandidatu na’in rua entre na’in 14 ne’ebé okupa númeru 1 no 2 sei avansa ba ronde daruak. Kandidatu na’in rua ne’e mak Ramos Horta no Lú Olo.
Iha ronde daruak, kandidatu na’in rua ne’e iha hotu posibilidade atu manan, maske posibilidade boot liu iha kandidatu José Ramos Horta nia liman, tanba nia hetan votus barak liu ho presiza de’it apoiu husi kandidatu PR balun hanesan Assanami.
Ho hanoin katak partisipasaun votante nafatin 664,106 votus ne’ebé Horta iha sei sa’e ba 348,489 ka 52.47%.
Signifika ho apoiu husi kandidatu PR na’in ida de’it ne’ebé okupa pozisaun lima aas liu, ho hanoin katak kandidatu refere ninia votus iha ronde dahuluk fó hotu ba Horta, Horta bele manan maioria ona.
Enkuantu bainhira Lú Olo konsege konvense kandidatu sira seluk hanesan Berta, Lere, Anacleto no Martinho, Lú Olo nia votus nafatin la to’o Horta.
Ho apoiu husi kandidatu na’in haat ne’e, Lú Olo nia votus sei to’o de’it 270,200 ka 40.68%.
Enkuantu bainhira kandidatu PR na’in 14 seluk, inklui Assanami, fó hotu nia votus ba Lú Olo, votus ne’ebé Lú Olo sei sa’e ba 345,691 ka 52.05%, no Lú Olo bele hetan vitoria.
Horta Agradese
Kandidatu Prezidente Repúblika númeru 14, José Manuel Ramos Horta haksolok ba rezultadu provizoriu eleisaun prezidensial ne’ebé hatudu maioria eleitór vota ba nia.
Horta agradese ba CNRT ne’ebé lidera husi Xanana, agradese ba partidu politiku seluk no movimentu sira no ba ema hotu-hotu ne’ebé fó apoiu ba ninia kandidatura.
“La’ós lider nasionál CNRT, maibé sira iha aldeia, suku no fatin hotu-hotu, ema simples, ema kiak ne’ebé naran nunka sai iha media, oin nunka sai iha televizaun, purtantu agradese hotu ba sira,” dehan Horta iha sede nasionál kandidatu, Hudi-Laran, Tersa (22/03).
Horta mós apresia ba kandidatu na’in 15 seluk ne’ebé ho idaidak nia matenek, kapasidade no lojistiku, ativu tebtebes, signifika Timor-Leste demokrásia dinamiku duni laos hanesan rai sira seluk, iha osan boot mak foin mehi atu sai kandidatu Prezidente Repúblika, maibé iha Timor-Leste, see mak hakarak sai Prezidente Repúbliku bele, tanba ne’e demokrásia.
“Kandidatu ida ne’e susesu boot, ita hetan mais 300 mil, ha’u kontente loos, ida ne’e, purtantu ba ha’u rezultadu ne’e pozitivu tebes,” dehan Horta.
Iha fatin hanesan, Prezidente Partidu CNRT, Kay Rala Xanana Gusmão lori partidu nia naran fó parabens ba kandidatu Horta tanba hetan pozisaun ida ne’ebé aas tebes.
“Ita husu boot katak segundu volta mai, ita sei la’o ho kalma, estabilidade, loos duni kazus balun ne’ebé akontese, iha kedas kampaña, ita husu boot atu hamenus tiha, labele baku malu, oho malu,” dehan Xanana.
“Semana rua tan sei mosu mai, ita mak sei lori todan ba vitoria tanba problema mak ida ne’e, ita defende direitu demokrátiku, defende ita-nia Konstituisaun ka ita husik hela ita-nia Konstituisaun sama nafatin, lei sira estraga nafatin, sistema viola nafatin hodi ita tama ba ditadura,” katak nia.
Lú Olo Konsensu Ona ho Kandidatu Balun
Kandidatu PR númeru 6, Francisco Guterres Lú Olo hatete, nia parte hahú halo komunikasaun ho kandidatu sira seluk hodi bele hetan konsensu.
“Negosiasaun polítika ko'alia apartir depois sira votus, horsehik (Segunda) kedas komesa ona, ohin no aban sei kontinua nafatin. Balun iha ona konsensus, see-see ne'e ha'u labele hatete iha ne'e,” dehan Lú Olo hafoin fó posse ba membru governu na’in haat iha Palasiu Prezidensiál Bairu-Pite, Tersa (22/03).
Maske defisil uitoan atu manan iha ronde daruak, maibé Lú Olo kontinua otimista katak nia sei manan.
“Avansa ronde daruak ne’e see mak ba konkore ne'e tenke aseita manán, tenke aseita lakon, hanesan kandidatu ha’u sempre garantia atu manán, agora rezultadu depois mak haree, bainhira dehan lakon tiha uluk ne'e lalika kandidatu, tanba ne'e mak ha’u iha garantia atu manán iha ronde daruak,” dehan nia.
