Maske la temi naran, maibé lider na’in rua ne’e konsidera ladun di’ak bainhira dader de’it ba ona hamriik iha ema-nia portaun.

Kandidatu PR husi CNRT, Ramos Horta hatete, nia parte fó bemvindu ba kandidatu no partidu politiku sira ne’ebé hakarak atu apoiu nia iha ronde daruak.

“Ha’u hatete ne’e kandidatu sira hotu no partidu sira hotu-hotu no partidu sira seluk karik apoiu kandidatu sira seluk karik, sempre benvindu atu tama ba movimentu boot ida ne’e, atu apoiu kandidatura, ha’u hanoin iha ne’e demokrásia nunee duni, dinamiku hanesan uluk akontese segundu ronde  mai,  iha kontaktus oioin ke akontese, maibé iha ne’e ha’u seidauk temi naran ruma. Ha’u mós lakohi dader sedu kedas ema-nia portaun,” dehan Lere liu husi konferensia imprensa, iha sede nasionál kandidatu, Hudi Laran, Tersa (22/03).

Iha fatin hanesan, Xanana hatete, Horta no nia parte fó benvindu ba hotu-hotu ne’ebé mak hakarak apoiu iha ronde daruak.

“(Horta) nu’udar kandidatu nia seidauk bele dehan see. Imi hakarak buat ne’e hotu iha horikalan meia-noite? imi hakarak dadersan tuku 6 ne’e ita kontaktu malu ona? ne’e mós demais,” Xanana hatete.

Iha oportunidade ne’e, Xanana apelu ba estrutura tomak partidu CNRT nian  husi nasionál ba Munisípiu, RAEOA, postu administrativu, suku no aldeia atu kontinua servisu hodi bele fó vitoria ba ronde daruak ba  Horta

“Demokrásia mak ida ne’e, ita hein, tanba iha ona lei regula katak bainhira mak hahú kampaña, bainhira mak termina hodi la’o ba eleisaun, ita hein de’it lia-fuan finál  husi CNE. Klaru ita sei kole, maibé kole ita sei la sente tanba objetivu ba interese nasionál ba ita-nia isin rasik, ita-nia kole ka la kole objetivu mak orienta ita iha hahalok politika ne’ebé ita-nia konstituisaun fó dalan mai ita atu hotu-hotu kumpre,” dehan Xanana.