Xefe Governu hato'o nia agradesimentu ne'e hafoin ezerse direitu votu hanesan sidadaun Timor, hafoin akompaña nia espoza ne'ebé kompetente mós ba iha eleisaun Prezidente Repúblika tinan ida ne'e nian.

"Primeiru lugar ha'u hakarak aproveita oportunidade ida ne'e agradese ba populasaun tomak tanba kampaña la’o di'ak loos no mós instituisaun sira ne'ebé tau matan ba seguransa no tau matan ba kampaña la’o di'ak, hein katak ida votasaun ne'e bele di'ak liu tan," dehan nia hafoin ezerse votu iha Ensinu Baziku Filial Metiaut, Sabadu (19/03).

Xefe Governu enkoraja inan-aman no joven sira hotu ne'ebé iha uma tenke sai ba iha sentru votasaun hotu atu ezerse idak-idak nia direitu ba votu, hodi deside aman ida ne'ebé di'ak hodi ukun nasaun ida ne'e ba oin.

"Ha'u enkoraja inan-aman joven sira labele para tenke sai husi uma ba sentru votasaun estasiens votu sira hodi ezerse imi nia direitu hili aman ida atu eleitu," nia akresenta.

Xefe Governu akresenta, Prezidente Repúblika ne'ebé sei eleitu, esperansa servisu hamutuk ho sidadaun hotu atu tau matan ba nasaun no povu tomak iha rai doben ida ne'e.

"Prezidente ne'ebé povu hili ida ne'e mak ita sei servisu hamutuk ho nia para ke tinan lima oin mai ne'e kontinua tau matan ba nasaun ida ne'e," tenik nia.