Enkuantu, nia senti kontenti no haksolok partisipa iha festa demokrasia nee nian, neebé prega ba eventu ba eleitorais nian.

Nia hatutan, nia ezerse nia direitu nuudar sidadaun ida neebé halo ho responsabilidade ho konsensia tomak no mós partisipa mós iha desizaun politika nasaun nian atu bele determina nasaun nia destinu iha tinan lima mai.

“Portantu ha’u nia kontribuisaun ba nasaun nia desizaun politika, kontribuisaun ba prosesu dezenvolvimentu no mós kontribuisaun ba prosesu konstrusaun estadu, ha’u determina ohin liu husi ezerse ha’u nia direitu nuudar sidadaun. Ha’u hanoin kada kandidatu iha nia optimizmu rasik, ida nee iha ha’u nia bairu rasik no garantia ida neebé mak iha katak, sei votantes mai ha’u, ha’u nia kaixa sei la mamuk,”dehan nia iha Eskola Primaria Públiku Nú-4, Mui Kuluhun, Postu Administrativu Cristu Rei, Munisipiu Dili, sabado nee (19/03).

Nia hatutan, manan ka la lakon, ida nee país demokratiku neebé mak adopta ona sistema demokrasia nian. Tanba nee, tenki simu rezultadu kualker saida mak atu mai.

Nunee, buat neebé kandidatu nee interese, mak ida, rezultadu nee husi solusaun prosesu ida demokratiku, prosesu ida pasifiku no prosesu ida laiha influensia husi parte seluk.

“Portantu rezultadu saida deit mak mai tenki simu nuudar sidadaun ida ho responsabilidade,”tenik nia.

Nia haktuir, hanesan kandidatura ida, iha esperansa sei manan iha vitoria no sei manan iha esperensia.

“Se ha’u la lori vitoria ha’u sei lori esperensia, entre rua nee, ha’u tenki manan,”haktuir nia.

Ho nunee, nia dehan, sei lori prezidente ida hakbesik liu ba povu laos, prezidenti ida neebé mak sai fali opozitor ba governu ka orgaun ezekutivu sira seluk, maibé prezidente ida neebé pro-povu signifika katak, prova buat hotu, inklui orgaun soberanu sira no instituisaun sira hotu neebé hala’o knar ba povu.

Enkuantu, sei lori ukun ida nee besik liu ba povu, no sei lori ukun ida nee ba liu povu sira neebé iha area remontas no rurais sira.

“Ha’u nia esperasan mak eleisaun ida nee ho partisipasaun ida masiva, ho partisipasaun ida ho numeru masimu, tuir  rejistu neebé mak iha katak rihun 8 resin sidadaun neebé rejistadu iha vitoria ida mesak ba TL, forá husi kestaun se mak manan nia eleitu, maibé kuandu partisipasaun ida masimu neebé ho numeru total rejistu, nee vitoria ida mai TL,”haktuir nia.

Tanba, nia dehan, ema hotu espresa ona vontade popular, demokratika no konsensia povu nian atu bele ezerse sira nia direitu.

Tuir observasaun Online INDEPENDENTE, iha terenu asesu katak, komunidade sira hahú forma ona iha fatin votasaun, hahú husi oras tuku 6, hafoin to’o tuku 7 sira ezerse sira nia direitu vota.

Iha sentru votasaun nee, hetan observasaun husi observador internasional Komunidade Países Lingua Portugués (CPLP-Sigla Portugués), Komisaun Nasional Eleisaun (CNE) no mós observador fiskais husi kandidatu na’in 16 nian.

Sentru votasaun nee lao ho seguru tanba hetan mós seguransa husi Polisia Nasional Timor-Leste (PNTL).

Aleinde, tuir observasaun nee, Kandidatu ho numeru sorteiu 5, hatais faru metan, kalsa coklat muda no sepatu koor silver.

No kandidatu refere, hetan seguransa husi Unidade Espesial Polisia na’in tolu.