Diretór Jeral STAE Munisipiu Vikeke, Honorio Kruz da Silva informa, hafoin verifikasaun ne’ebé hala’o husi STAE, reprezentante fiskais kandidatu PR na’in 16 no Polisia Nasionál Timor-Leste munisipiu Vikeke, identifika buletin votus balun la di’ak.
“Iha prosesu verifikasaun ita deteta iha material sensitive, buletin votus, hamutuk 11 mak la di’ak, tanba iha sia (9) tinta kona kandidatu balun no rua laiha númeru serial. Ida ne’e mak ita deteta, seluk di’ak hotu no kualidade di’ak,” informa Honorio ba jornalista Jornal INDEPENDENTE via telefone, Kuarta (16/03).
Hafoin identifika buletin votus ne’ebé aat ne’e, nia hatete, STAE sei tau karimbu kanseladu no sei la uza iha prosesu votasaun.
“Buletin ne’ebé mak ami deteta la di’ak ne’e ba iha sentru votasaun ami sei la uza, hasai tiha, sei tau karimbu kanseladu katak iha prosesu eleisaun ita sei la uza buletin ne’ebé mak aat ne’e,” nia esplika.
Entretantu, buletin votus ne’ebé STAE munisipiu Vikeke simu husi nasionál livru rihun 1.321 no total foila hamutuk rihun 66.050.
“Livru buletin hamutuk rihun 1.321 ho iha foilla hamutuk rihun 66.050 mak ita halo verifikasaun, ita detekta iha foilla hamutuk 11 mak la di’ak, tanba ne’e sei uza de’it foilla hamutuk rihun 66.039 no kada livru sira ne’e ita verifika livru ida hamutuk 50 foilla,” dehan nia.
Tuir planu, iha 18 Marsu ne’e, ekipa tekniku no brigada sira ho apoiu seguransa husi PNTL sei distribui buletin votus ba sentru votasaun 92 no estasaun votus 112 iha munisipiu Vikeke.
Tuir dadus munisipiu Vikeke ne’ebé kompostu husi suku 36 no Postu Administrativu lima (5) ho total eleitór hamutuk rihun 58,421, kompostu husi mane rihun 29.675 no feto rihun 28. 746.
Evita Manipulasaun Votus
Vise Reitór Datolun Universidade Dili (UNDIL), Hugo Lourenço da Costa husu ba Sekretariadu Tékniku Administrasaun Eleitorál (STAE) atu kontrola didi’ak eleisaun Prezidente Repúbliku nune’e labele mosu manipulasaun.
“Laiha presaun no laiha manipulasaun, labele tenta manipula ema-nia votus, entaun STAE no fiskais kandidatu sira, fiskais internasionál, nasionál atu servisu masimu hodi kontrola didi’ak bainhira prosesu eleisaun hahú no remata, hotu-hotu assume ninia kna’ar, ne’e responsabilidade, ida ne’e mak importante,” dehan nia, iha kampus UNDIL, Kuarta (16/03).
Importante tebes, tuir nia, labele iha ameasa no manipulasaun nune’e rezultadu saida de’it mak mosu ka see de’it mak sai Prezidente Repúblika sei sai Timor-ona tomak ninia PR durante tinan lima mai.
“Entaun espiritu sira hanesan ne’e ita tenke promove no tenke haklean nafatin, labele iha lakon depois ita mosu protesta tuun-sa’e, la simu, entaun ita hakarak eleisaun ne’e ho di’ak, transparente, ema hotu tenke simu rezultadu ne’ebé mak atu mai, tanba Prezidente repúblika povu ezerse ninia direitu direta atu hili ema atu sai Xefe Estadu,” nia hatete.
