Hahú ohin, 17 to’o 18, tama iha periodu silensiu hodi fó biban ba povu, liu-liu eleitór sira atu hanoin no tetu hodi bele hili kandidatu Prezidente Repúblika ne’ebé ninia vizaun no misaun kona sira-nia laran.
Molok ne’e, Diretór Jeral Sekretariadu Tékniku ba Administrasaun Eleitorál (STAE), Acilino Manuel Branco informa, periodu kampaña eleitoral sei hala’o durante loron 15 nia laran, hahú husi 2 to’o 16 Marsu.
“Loron 17 no 18 Marsu ne’e tempu silensiu, sei laiha tipu kampaña sira par depois ema idaidak halo reflesaun konsensia par bele eskoila ninia kandidatura iha 19 Marsu iha sentru votasaun no estasaun idaidak,” dehan nia.
Iha loron 20 no 21 Marsu 2022, nia dehan, sei halo apuramentu rezultadu iha munisipiu hafoin sei lori na halo apuramentu iha nivel nasionál durante loron tolu (3).
“Depois iha tan loron tolu par CNE hein mós rezultadu husi diaspora ninian, depois tau hamutuk haruka ba Tribunál Rekursu. Iha loron balun iha ne’eba Tribunál Rekursu sei analiza par depois prosesu hotu-hotu sei lao tuir nia tempu, se karik iha rekursu ruma ba desizaun kona-ba rezultadu, ikus mai desizaun sira Tribunál Rekursu fó sai ona,” katak nia.
Tuir kalendariu, nia hatutan, iha 1 Abril 2022, TR sei anunsiu rezultadu finál ba eleisaun Prezidente Republika.
Karik akontese segunda volta, nia hatete, ninia sekuensia sei nafatin no tuir lei eleisaun segunda volta sei akontese iha loron 30 tuir mai, sura husi realizasaun eleisaun primeira volta nian, signifika loron 30 tuir mai mak 19 Abril 2022.
Entretantu, kandidatu Prezidente Repúblika na’in 16 ne’ebé kompete iha eleisaun prezidensial ba tinan ne’e mak: Isabel da Costa Fereira (1); Hermes da Rosa Correia Barros (2); Maria Angela Freitas da Silva (3); Rogerio Tiago de Fatima Lobato (4); Anacleto Bento Ferreira (5); Francisco Guterres Lú Olo (6); Maria Milena Lopes de Jesus Pires (7); Tito da Costa Cristovão ‘Lere Anan Timur’ (8); Armanda Berta dos Santos (9); Antero Bendito da Silva (10); Constancio da Conceição Pinto ‘Terus’ (11); Virgilio da Silva Guterres ‘Lamukan’ (12); Martinho Germano da Silva Gusmão (13); José Ramos Horta (14); Felisberto Araujo Duarte (15); no Mariano Assanami Sabino (16).
