Diretór Jerál STAE, Acilino Branco hatete, ba pasiente sira, familia no mós médiku ne'ebé iha HNGV, balun la konsege ezerse sira-nia direitu votu tanba prosesu tomak mai husi ospitál tuir loron ne'ebé determina.

" STAE la tuun direta ba rekolla sidadaun sira-nia kartaun eleitorál, tanba responsavél ne'e ospitál mak haruka lista mai ate loron 10 antes ba loron eleisaun," dehan nia, iha knaar fatin, Kaikoli, horisehik.

Nia dehan, bazeia ba lista ne'ebé haruka maka parte STAE fasilita hodi organiza atu pasiente, familia ne'ebé akompaña no médiku sira atu bele vota iha fatin ne’e.

Tanba ne'e, nia dehan, prosesu tomak la’o ho di'ak maibé bainhira remata eleisaun maka STAE sei halo avaliasaun ba preokupasaun balun ne'ebé sidadaun sira hasoru.

"Depois eleisaun hotu ita sei haree avaliasaun ruma husi relatóriu monitor sira para oinsá karik ida ne'e puramente kestaun tekniku ita sei haree para halo melloramentu" dehan nia.

Nia dehan, ba pasiente sira ne'ebé rekopera ona bele vota iha kada ida-ida nia suku no la presiza atu vota iha fatin ne’e.

Maibé, nia dehan, preokupasaun hirak ne'e mak sai legál duni maka parte kompetente sira mós sei toma konta ba situasaun balun tanba STAE mós la simu reklamasaun eskrita husi sidadaun sira.

"Buat ne'e liga ho kestaun legál ruma ha'u hanoin parte kompetente oinsá bele toma konsiderasaun ba situasaun sira balun purke ami mós la simu reklamasaun eskrita tanba ami mós akomapaña hela iha média balun," dehan nia.