Diretór Jerál STAE, Acilino Manuel Branco hateten, preokupasaun sidadaun sira ne'ebé la konsege vota iha Sentru Paralelu balun iha Dili, tanba seidauk kompleta rejista ikus iha STAE.

"Depois sira foti deklarasaun iha suku tenke ba iha postu administrativu rejista, hafoin haruka naran ne'e ba iha STAE nasionál," dehan nia, iha knaar fatin, Kaikoli, horisehik.

Nia dehan, iha momentu sentru votasaun paralelu eleitor sira reprezenta sira seluk nia preokupasaun hotu ne'ebé ba hoto'o iha STAE la hanesan.

Nia esplika, altura ne'ebá eleitor sira balun sei uza hela kartaun unidade jeografika rai li’ur nian, maibé hakarak ezerse nia votu maski seidauk rejista iha STAE.

"Sentru votasaun paralelu ne'e só fasilita de'it ba ita-nia eleitor sira tuir prazu ne'ebé rejista iha STAE " dehan nia.

Tanba ne'e, nia dehan, ikus mai eleitor ne'e rekonese, seidauk rejista duni atu vota maski iha momentu ne'ebá rejistasaun sei loke hela ba sidadaun sira hotu.

Nia dehan, seluk maka husi estudante universitáriu sira ne'e maka númeru barak liuhusi sira-nia eskola kanaliza liu husi MESSK haruka mai tuir tempu ne'ebé STAE fó sai. Maibé sira balun naran iha ona sentru paralalu, maibé hakarak fila-fali ba ida-idak nia munisipiu labele vota, tanba lista jerál paralelu distribui hotu ba kada munisipiu no aldeia.

"Ikus mai saida mak akontese iha sentru votasaun balun deteta estudante sira balun naran iha lista paralelu, maibé fila-fali ba suku orijen, entaun situasaun sira ne'e mak ita-nia sidadaun balun la konsege vota," dehan nia.

Tanba ne'e, STAE mós preokupa duni ba sidadaun sira hotu maibé mekanizmu no prosedimentu, fiar katak ho prosesu ne'ebé la’o hatudu partisipasaun di'ak signifikante tebes

Entretantu, Prezidente Comisaun Nasional Eleisaun (CNE), Jose Agosntinho Belo hateten, durante votu prosesu kona-ba infrasoes laiha, ne'e hanesan kestaun tekniku, liuliu ema sira ne'ebé paralelu la partisipa másimu tanba kestaun hatama lista nian tarde.

"Nune'e mós iha fatin ne'ebé ekipa sira dala-ruma iha sentru votasaun ne'e tama ho karreta, depois iha mós sira problema ida mak ita haruka kedas polisia hasai," tenik nia.

Nia sublina, iha sentru votasaun mós hanesan, balu sira-nia paralelu besik hela, ita haruka sai, iha mós protesta buat sira ne'e mas lei dehan sira labele besik sentru votasaun.