Maske seidauk fó komentariu kona-ba posibilidade hakat ba ronde daruak nian, maibé Komisaun Nasionál Eleisaun deklara sempre prontu ba kualker situasaun.
“Iha CNE ami seidauk sura hotu no seidauk kompletu, seidauk fó komentariu, ha’u hanoin CNE sempre prontu, tanba segundu ronde fulan ida de’it, kampaña mós 15 dias nafatin, maibé prosesu la’o hela,” dehan Prezidente CNE, José Agostinho Belo, iha Otél Timor, Segunda (21/03).
Kona-ba rezultadu eleisaun, nia dehan, horseik nu’udar loron ikus ba prosesu apuramentu nasionál no ohin STAE sei intrega ba CNE hodi halo verifikasaun ba votus nulu no votus reklamadu sira.
“Espera katak loron rua ka loron tolu nia laran rezultadu ita bele fó sai ona,” dehan nia.
Iha fatin ketak, Diretór Jerál STAE, Acilino Manuel Branco hatete, prosesu sei la’o hela, liu-liu apuramentu munisipiu.
“Ne’ebé mak falta husi munisipiu tolu (3) mak Dili falta 50 aktas, Kovalima falta 18 aktas, Bobonaro 20 ka 21 aktas,” nia hatete.
Tan ne’e, nia hatutan, atu bele hatene kona-ba tasa partisipasaun depois apuramentu ne’e remata mak foin hatene loloos.
“Sura akta husi munisipiu hotu foin mak hatene loloos partisipasaun ita ninian eleitor sira iha eleisaun,” dehan nia iha edifisiu STAE Kaikoli, Segunda (21/03).
Kona-ba posibilidade ba ronde daruak, nia dehan, Tribunal Rekursu mak iha kompetensia atu fó sai rezultadu.
“Kuantu mais bainhira iha posibilidade iha kandidatu balun mak bele hakat ba iha eleisaun segundu ronde, ida ne’e ita sei haree ninia prosesu tomak no kompetensia tomak Tribunal Rekursu mak fó sai,” dehan nia.
Entretantu, Maske posibilidade atu hakat ba ronde daruak nakloke maibé la taka dalan mós ba kandidatu PR, José Ramos Horta, atinze porsentu 50+1.
Jurista Timor-oan, Amu Júlio Cripin hatete, sei iha posibilidade atu Horta bele manan iha ronde dahuluk maibé ho kondisaun katak votus restu ne’ebé seidauk sura ba hotu nia.
“Agora restu 30 ital akta ne’e ema total kala 80 ital mill, ne’e se sura mak ba hotu Horta ne’e nia liu ona 50 pursentu, maibé seidauk hatene vota nia ka la’e,” dehan nia.
Iha fatin ketak, Diretór Ezekutivu Luta Hamutuk, José Alves da Costa hatete, haree ba rezultadu provizoriu ne’ebé iha sei akontese ronde daruak.
“Bazeia ba dadus ne'ebé iha, votante 500 mill resin ne'ebé tama ona iha kontajen aprovadu, kandidatu husi partidu CNRT, Ramós Horta, foin atinze 45%, agora hela de'it pursentu 6 atu fiksa ona ba 100%. Tan ne’e ha’u la fiar katak 6 ho 7 % ne'e hotu-hotu ba iha Ramós Horta, sei fahe. Entaun másimu 47% mak Ramós Horta sei hetan, restu ne'e sei fahe ba sira seluk,” dehan nia.
