Iha kampaña eleitoral ba kandidatu Prezidente Repúbliku númeru 6, Francisco Guterres Lú Olo, Alkatiri hasai deklarasaun ida hasoru Lere. Alkatiri hasai deklarasaun ne’e relasiona deklarasaun husi Lere ne’ebé hatete Lú Olo sei la manan tanba nia ho Alkatiri nia lisan la hanesan.

Iha momentu ne’ebá, Alkatiri husu ba Lere atu husu deskulpa ba nia tanba tinan lima tan mai sira sei servisu hamutuk.

"Ha'u dehan ida ne'e ba ha'u nian alin Lere Anan Timur, ha'u hein ita-boot atu kontaktu mai ha'u husu deskulpa, tanba ha'u hanoin tinan lima tan ita sei servisu hamutuk. Se ita-boot ho orgullu la husu deskulpa tinan lima lalika buka ha'u," dehan Alkatiri iha kampania ba kandidatu PR Lú Olo iha kampu Fetebol Maliana, 5 Marsu liu ba.

Alkatiri hatete, bainhira nia koalia hatan ba deklarasaun Lere nia sente laran moras.

“Bandeira ida nia hadomi ne’e nia la hatene sai husi ne'ebé, nia hatene de'it uza bandeira ne'e maibé nia la hatene bandeira ne'e sai husi ne'ebé, sala boot,” dehan Alkatiri.

Alkatiri dehan, tempu sei naruk, tan ne’e bainhira Lere hatete Lú Olo la manan tanba lisan la hanesan, nia tenke hanoin didi’ak fali lai, tanba keta loron ruma sei servisu hamutuk fali.

“Hanoin didi'ak ba atu labele ko'alia hanesan labarik, tinan lima tan keta Lere presiza fali ida lisan laiha ne'e, keta presiza fali ida lisan la hanesan ne'e. Tinan lima tan keta ita na'in rua sei hamutuk hadia rai atu kuda buat ruma, hanoin didi'ak ba, dezde ha'u koñese Lere ha'u respeita Lere, maibé ha'u la admite falta respeitu ida ne'e,” dehan Alkatiri.

Maibé realidade ne’ebé mósu oin seluk. Seidauk to’o fulan Alkatiri mak tenke ba buka Lere to’o nia uma.

Sorte aat mós, tanba bainhira Alkatiri ba Lere nia portaun taka hela.

Iha 21 Marsu tuku 8 dader, Sekretariu Jeral Fretilin, Mari Alkatiri, hakat ba kandidatu Prezidente Repúblika númeru 8, Lere Anan Timur, nia rezidensia ho intensaun atu hasoru-malu.

Maibé, Lere nia portaun la loke ba Alkatiri, ikus mai Alkatiri tenke fila de’it ho ‘liman mamuk’.

Hafoin Alkatiri fila, iha tuku 11.30, Primeiru Ministru Taur Matan Ruak, mak ba fali Lere nia uma iha area Farol, Dili.

Lere loke duni nia portaun ba Taur hodi hasoru-malu.

Hafoin koalia ba malu besik menutu 30, Taur hatete, nia mai fó parabéns ba Lere ne’ebé kompete iha eleisaun PR, maske la manan maibé Lere kontribui duni ba eleisaun ne’ebé pasifiku.

"Ha'u mai fó parabéns de'it tanba fó kontribuisaun ba eleisaun ida pasifiku, ida ne'e de'it mak ha'u hasoru, nune'e de'it, bé imi dehan la tebes ne'e, imi mak Maromak sig ami-nia laran hotu," dehan Taur hafoin hasoru-malu ho Lere, Segunda (21/03).

Iha fatin hanesan, Lere hatete, Taur ba hasoru nia tanba nu'udar maun ho alin fó Solidariedade ba malu.

"Primeiru Ministru mai la'os Primeiru Ministru mak mai, mais ha'u-nia alin Taur mak mai, tanba nia hatene katak ha'u la pasa ba Kandidatu Prezidente ne'e mak nia mai nu'udar maun-alin solidariedade, ida ne'e de'it, ami la trata ba buat seluk," dehan nia.

Lere afirma, iha hasoru-malu ne’e laiha liafuan seluk mak sira koalia, maibe nu'udar maun-alin Taur fó solidariedade.

Kona-ba Alkatiri ninia prezensa, Lere dehan, bainhira Alkatiri mai nia laiha fatin.

"Depos mak ita haree, mais Mari (Alkatiri) mai ne'e la'os kualker, ema Sekretariu Jeral, ha'u Fretilin nafatin, la'os ha'u lakon bé ha'u la Fretilin ne'e laiha, se ha'u la Fretilin ha'u nega ha'u-nia maluk sira fakar raan. Ne'e mak ha'u dehan katak ida ne'e depois mak haree," deklara nia.

Hatan kona-ba karik ba ronde daruak, Lere dehan nia seidauk bele koalia kona-ba nia pozisaun ba oin.

"Ida ne'e ha'u seidauk responde tanba ha'u kolen foin daudauk ha'u mesak mak lao, hanesan baibain dehan ha'u oan ki'ak bé lao mesak-mesak, entaun ha'u kolen bé husik ha’u hanoin lai," katak nia.

Lere dehan, maske nia militante no simpatizante sira la konfortavel ho rezultadu ne’ebé iha, maibé nu’udar ema ne’ebé harii nasaun no fakar raan ba nasaun sei servisu hamutuk hodi haburas liu tan demokrasia iha TL.

"Ha'u hanoin katak militante sira sente la konfortavel, maibe ha'u hanoin katak ha'u komprende nasaun ita mak harii, ita mak haburas, tanba ida ne'e mak ha'u hanoin katak laiha problema no ha'u rasik fakar raan ba nasaun no rai ida ne'e entaun ita tenke servisu hamutuk, maibé ita-nia demokrasia tenke buras," dehan nia.

Lere hatutan, demokrasia tenke buras maibé labele buras fali ho osan no labele buras fali ho lia bosok.

“Tenke iha justisa ho lia loos, ida ne'e futuru bele sai di'ak. Mais hanesan Agora ita joga osan, lia bosok, ha'u hanoin katak ha'u hanoin ha'u-nia oan sira ne'e, ami ne'e katuas ona bé ami hanoin katak laiha problema, ema ida labele moris to'o 200 anos ate ita Timor idade 80 ita komesa la produtivu ona, la bele servi estadu, dala-ruma mós nein servi familia," dehan nia.