Iha 21 Marsu dader, Sekretariu Jeral Partidu Fretilin, Mari Alkatiri hahú halo aprosimasaun ba kandidatu Prezidente Repúblika númeru 8, Lere Anan Timur, maibé la konsege tanba Lere laiha fatin.
Iha tuku 11.30, Primeiru Ministru Taur Matan Ruak hakat ba Lere nia fatin no konsege hasoru-malu.
Tuir informasaun ne’ebé jornalista jornal INDEPENDENTE hetan husi fonte ne’ebé besik, iha enkontru refere, Taur husu atu Lere fó apoiu ba Lú Olo bainhira akontese ronde daruak.
Maibé, fonte ne’e hatete, Lere rekuza no hein de’it ninia maun boot, Xanana Gusmão.
“Pai hatete nia hein de’it nia Maun Boot,” dehan fonte ne’e.
Hafoin hasoru-malu ho Lere no la hetan ‘apoiu’, tuir informasaun, iha loraik, PM Taur hakat ba Konseleiru Masimu Partidu Khunto, José Naimori Bukar, nia rezidensia hodi halo enkontru.
Tuir informasaun, PM Taur ba Naimori nia rezidensia iha tuku 5 ka tuku 6.
“Primeiru Ministru ohin ba hasoru (Naimor) pas tuku lima ou tuku neen loraik,” informa Prezidente Ekipa susesu kandidatu PR númeru 9, Armanda Berta, Marito Magno, bainhira hetan konfirmasaun husi jornalista Jornal INDEPENDENTE via telefone, Segunda (21/03) kalan.
Kona-ba asuntu ne’ebé PM Taur ho Naimori koalia, Marito hatan, nia mós la hatene asuntu ne’ebé lider na’in rua ne’e deskuti.
CNRT sei Aprosima Lere-Assanami
Entretantu, ba kandidatu Prezidente Repúblika númeru 14, José Ramos Horta ne’ebé iha posibilidade hakat ba ronde daruak, iha ona lista ne’ebé sei aprosima.
Tuir informasaun husi fonte iha partidu CNRT, bainhira akontese duni ronde daruak, CNRT sei halo aprosimasaun ba kandidatu PR sira ne’ebé la konsege avansa ba ronde daruak.
Kandidatu PR ne’ebé tama iha lista CNRT mak Lere Anan Timur no Mariano Assanami Sabino.
“Iha mós posibilidade atu hakbesik an ba kandidatu seluk tan hanesan Anacleto no Hermes,” dehan fonte ne’e.
Kona-ba posibilidade atu husu apoiu ba kandidatu PR husi partidu Khunto, Armanda Berta, fonte ne’e dehan Berta la tama iha sira-nia lista.
“Berta la tama. Ida ne’ebé klaru ona mak pai LAT ho maun Assanami,” dehan fonte ne’ebé lakohi públika nia identidade.
Maske nune’e, fonte ne’e hatutan, Horta ho partidu CNRT sei diskuti kona-ba vantajen no dezvantajen molok foti desizaun.
