“Husu ba komunidade hotu, informasaun ne'ebe espalla no fó sai husi elementu balun dehan bulletin votu kuak, ne'e hoax,“ dehan Diretor Jeral STAE, Acilino Manuel Branco, iha knaar fatin, Kaikoli, horisehik.
Nia espika, iha estasaun balun identifika problema balun ne’ebé tau ona iha akta maibe la’ós bulletin votu mak kuak.
Entretantu, material sira liuliu bulletin votu ne'ebe transporta ba munisipiu hotu-hotu ho seguru, tanba hetan akompañamentu husi parte oioin no hetan seguransa husi PNTL.
Prosesu ne'e halo hotu-hotu guia ho forma ne'ebe transparente, reprezentante observador no reprezenta kandidatu, reprenzentante CNE no mós seguransa PNTL nian halo akompañamentu ba prosesu preparasaun tomak iha kada munisípiu.
Entretantu, preparasaun husi STAE ba ronda eleisaun prezidensial iha rai-laran no ra-li’ur másimu tebes. Tanba ne’e, garante katak prosesu hotu sei la’o ho susesu.
Acilino hateten, husi preparasaun nasional to’o munisipál espera votasaun la’o ho seguru, tanba material hotu finaliza ona ba munisipiu ida-idak ho susesu.
“Ekipa nasional lori transporta material ne'ebe munisipiu sira presiza, hanesan laptop no komputador hodi utiliza halo apuramentu ba munisipiu nian,” dehan nia, iha knaar fatin, Kaikoli, horisehik.
Entaun, preparasaun husi nivel nasionál oinsa bele mobiliza rekursu no mos apoiu husi Ministeriu Administrasaun Estatal (MAE) atu reforsa autoridade munisipiu ida-idak atu bele garante transportasaun no mós rekolla fila-fali material sira husi munisipiu mai fali sentru la’o ho diak no susesu.
STAE mos prepara hela realiza apuramentu iha munisipiu sira durante loron tolu no sistema apuramentu nian ne'e prepara no instala hotu ona, hein loron 19 Marsu 2022 ba oin karik akta ruma husi munisipiu ruma tama mai publiku bele akompaña liu husi televizaun ne'ebe fó sai rezultadu.
Enkuantu, STAE mos fo hela asistensia ba rai-liur nian. Oras ne'e dadauk tekniku sira husi STAE, Ministeriu Negosiu Estranjeiru no CNE iha ona alvu hodi aselera.
Dasudaun ne'e ekipa tekniku sira hamutuk ho embaixador sira halo ona preparasaun para atu realiza eleisaun ne'e.
Iha rai-liur mos presiza atu garante sistema sira iha ne'e tenke funsiona, tanba sira iha ne'eba diferente oras, oinsa preparasaun ne'e atu bele komunikasaun ida.
Enkuantu, parte seluk STAE halo koordenasaun ho MAE liuhusi patrimoniu estadu nian, dispunibiliza ona viatura besik 150, ne'ebe apoiu ona kombustivel no nesesidade sira ba motorista sira halo dezlokasaun ba munisipiu sira hodi apoiu transportasaun.
Tanba tuir planu, STAE nian presiza viatura unidade 519 hodi apoiu transportasaun no mos rekolamentu material fila-fali.
STAE mos garante hela kapasidades internet iha edifisiu STAE munisipiu 12, inklui RAEOA oinsa bele tranzmite rezultado provizoriu liuhusi sistema sira ne'ebe monta ona iha munisípiu.
