Xefe Governu kontente, hanesan Ministru Interior bainhira halo akompanamentu ba tomak ba kampaña, embora iha insidente ki’ikoan, maibé jeralmente ne'e la'o di'ak hotu ne'ebé kontente.

"Ha'u husu populasaun sira(…) kontribui ba estabilidade no seguransa atu eleisaun prezidensiál ne'ebé sei akontente iha 19 Marsu (2022) ne'e bele la'o di'ak. Segundu, mak aumenta taxa partisipasaun ita nian," dehan PM Taur iha Palasiu Prezidensiál, Bairru-Pité, horisehik.

Tuir nia, rua ne'e ajuda makaas no refleta iha avaliasaun dezempeñu demokrátiku pais ida nian, see kontribuisaun di'ak, partisipasaun di'ak, ne'e fó privilejiu boot ba nasaun.

"Tanba ne'e ha'u husu atu aumenta taxa partisipasaun, sidadaun hotu-hotu ne'ebé bele halo esforsu atu vota no hili kandidatu sira ne'ebé kandidata an ba PR periodu 2022-2027," tenik nia.

Entretantu, eleisaun prezidensiál ba periodu 2022-2027 sei akontese iha loron Sábadu (19/03), kandidatu hamutuk na'in 16, inkluidu populasaun Timor-Leste sei ba sentru votasaun hodi determina nia votus ba tinan lima nian.