Prezidente Komisaun Nasional Eleisaun (CNE), José Agustinho Belo hatete, CNE halo lansamentu ba tabulasaun nasional no plataforma transformasaun dijitál ne’e dezenvolve tanba iha kooperasaun ho UNDP no CORE-TL.
“Objetivu husi lansamentu ne’e atu eleva koñesimentu komponente jestor eleitorál sira, nian hodi tranzmite informasaun eleitorál ho efisiente iha tempu eleisaun ne’ebé sei mai,” dehan nia, iha salaun CNE, Kolmera, horisehik.
Nia hatutan, espetativu husi estabelesimentu plataforma transformasaun dijitál foun ne’e hodi hasa’e númeru partisipasaun sidadaun to’o 10.000, hodi assesu informasaun ne’ebé loos no atual kona-ba eleisaun no lala’ok ba prevensau Covid-19.
Nia dehan, eleisaun ne’ebé sei realiza iha situasaun pandemia nia laran no efetividade komunikasaun ne’e prioridade tebes ba eleisaun, tanba ne’e tenke garante atu fornese informasaun ne’ebé sufisiente ba eleitór no funsionariu sira atu prevene Covid-19.
Sentru tabulasaun nasionál no plataforma transformasaun dijitál ne’e signifikativu tebes ba sistema ne’ebé halo sidadaun sira hotu bele assesu ba informasaun importante sira kona-ba eleisaun no Covid-19.
Bazeia ba akordu ne’e, entre UNDP no CNE, projetu CORE-TL atu apoiu CNE iha atividade sira hanesan atualiza website CNE nian ho informasaun foun, inklui Covid-19.
Iha fatin hanesan, peprezentante PNUD iha Timor-Leste, Munkhtuya Altangerel hateten, eleisaun ne’ebe justu mak baze husi demokrasia. Tanba ne’e, Japaun apoiu ona eleisaun iha Timor-Leste durante tinan 20-resin.
“Eleisaun prezidensiál ba dala lima la’o daudaun, ami sai dadaun testemuña ba kampaña eleitoral ne’ebe nakonu ho entuziasmu, iha país laran tomak, inklui mós debate entre kandidatu prezidensial sira,” tenik nia.
Nia dehan, eleisaun prezidensial ne’e mak eleisaun dahuluk ne’ebé implementa iha Covid-19 nia laran no presiza preparasaun diferente sira hodi responde ba situasaun pandemia ne’e.
Relasiona ho ida ne’e, Japaun deside ona hodi oferese apoiu espesial ba eleisaun resiliente Covid-19 nian liu husi kolaborasaun ho PNUD uza finansiamentu tokon US$ 4 husi osan kontribuisaun taxa povu Japones sira nian.
Nia relata, lansamentu ba CNE nia Centru Apuramentu Nasional no Plataforma Dijital ka website ne’ebé kobre prosesu tomak husi eleisaun prezidensial ne’e.
