Ekipa susesu husi kandidatu Prezidente Repúblika númeru 14, José Ramos Horta, konsidera ema barak nakdedar ho eleisaun prezidensial periodu 2022-2027.

“Eleisaun prezidensial agora halo ema barak nakdedar. Ema tenta meius oioin atu manipula eleitór sira, ema tenta meius oioin dezorienta eleitores nia votu, ema tenta kria meius oioin ke bele mosu fraude eleitorais,” deklara nia liu husi konferensia impresa iha sede nasionál kandidatu Horta, Hudi Laran, Kinta (17/03).

Nia fó sai mós informasaun balun ne’ebé espaila katak iha munisipiu balun buletin votus balun kuak tiha ona.

“Evidensia mak ne’e, hatudu ona katak iha tendensia manipulasaun ligadu mós intimidasaun  partidu balun depois halo kampaña ba liu Sede CNRT, ida ne’e indikativus ne’ebé mak hatudu katak iha ipotes boot tebtebes atu ema balun ne’ebé ladun fiar an ona, utiliza meius oioin atu intimida, terror, hatauk eleitor sira atu ba vota,” nia hatete.

Aleinde fraude eleitoal, nia dehan, aat liu bele pertuba prosesu tomak durante periode votasaun no kontazen votus.

Haree ba ida ne’e, Coelho hatete, mosu preokupasaun ekipa ne’ebé reprezentan kandidatu 14 no pedidu husi kandidatu rasik no Xanana Gusmão, kona-ba iha tendensia atu la kualifika demokrasia.

“Tanba ema ne’e toman tiha ona, Konstituisaun la respeita mós toman tiha ona kuantu mais lei sira ne’e. Tanba ida ne’e mak ita iha obrigasaun atu husu ba orgaun eleitorais, liu-liu Prezidente CNE, Jose Belo, Diretor Jerál STAE, Acilino Manuel Branco atu haree no investiga realmente transporta bulletin votus balun ne’ebé mak públiku hatene, deteta, kaer tiha ona, sai tiha provas katak iha indisiu halo kuak  tiha ona, presiza investiga,” nia husu.

Nia deskonfia, iha mós bulletin votus balun ne’ebé tu’u kuak ona no la konsege deteta.

“Ida ne’e toman mak ne’e, bele mós seluk ba liu tiha ona,” nia hatete.

Nia husu ba CNE no STAE atu koopera ho instituisaun seguransa no defeza hodi kontrola transportasaun materia eleisaun ba sentru votasaun, kontrola no fó kbiit di’ak liu ba fiskais kandidatura sira nian atu kontrola didi’ak materia eleitoral refere.

Coelho mós husu atu durante prosesu votasaun presiza iha kontrolu maka’as husi CNE no STAE, no halo kordenasaun di’ak ho instituisaun defeza no seguransa atu la permite grupu organizadu ruma hatauk eleitor no pertuba prosesu votasaun no prosesu kontazen.

“Atu manan, manan ho di’ak, labele hakarak manan mais pertuba prosesu ne’e tomak, la kontribui ba prosesu konstrusaun estadu, la kontribui prosesu hametin demokrásia, la kontribui ba kualifikasaun liberdade espresaun ba sidadaun idaidak nian atu ezerse nia direitu politiku forma konsiente,” deklara nia.

Iha fatin ketak, relasiona ho kazu ‘ataka’ ba sede CNRT husi joven balun ne’ebé uza atributu partidu politiku balun, Polisia Nasionál Timor-Leste kaptura ona sidadaun na’in rua no detein ona iha komando PNTL munisipiu Dili.

“Loos duni iha loron 16 Marseu akontese kazu ataka sede partidu CNRT,  tanba ne’e ita-nia patroillamentu konjunta Eskuadra Polisia Dom Aleixo ho Na’i Feto foti ona sidadaun na’in rua, ita detein iha detensaun atu loke prosesu investigasuan,” informa Henrique ba jornalista sira iha Kuartel Jeral PNTL, Kaikoli-Dili, Kinta (17/03).

Sidadaun na’in rua ne’e, nia dehan, uza motor rua hodi ba halo atake iha sede partidu CNRT.

“Kona-ba sidadaun na’in rua nia inisial no motivu loloos ha’u seidauk simu relatoriu husi investigasaun, maibé iha duni sidadaun na’in rua mak ita detein ona, liga ho kazu ataka sede partidu CNRT nian,” dehan nia.

Entretantu tuir informasaun ne’ebé jornalista Jornal INDEPENDENTE asesu, kazu ataka sede partidu CNRT ne’e deskonfia husi apoiante no simpatizante kandidatu Prezidente Repúblika númeru 6, Francisco Guterres Lú Olo. Ataka ne’e mosu hafoin kampaña loron ikus kandidatu númeru 6 ne’e iha Tasi Tolu.

“Sim, iha sidadaun na’in rua mak ami kaer ona, sira-nia inisial J ho F, ita deskofia sira husi apoiante no simpatizante husi partidu Fretilin, tanba sira uza uniforme kandidatu PR Lú Olo nian,” informa fonte ida husi PNTL ne’ebé lakohi públika nia identidade.

Info Buletin Votus Tu’u Kuak Falsu

Iha fatin ketak, Diretor Jeral  Sekretariu Tekniku Administrasaun Eleitoral (STAE), Acilino Manuel Branco, rekuza informasaun ne’ebé espaila katak iha bulletin votus ne’ebé ema tu’u kuak ona.

Alcino dehan, materia sira, liu-liu bulletin votus ne'ebe transporta ba iha Munisipiu hotu-hotu seguru tanba akompaña husi parte oioin no hetan seguransa husi Polisia Nasionál Timor-Leste.

Felismente, nia hatutan, iha prosesu ba preparasaun ne'e identifika situasaun balun maibé koloka ona iha akta kona-ba situasaun sira ne'ebé deteta iha kada Munisipiu.

Maibé, Acilino afirma, prosesu ne'ebé halo hotu-hotu guia forma ida ne'ebé transparente tanba reprezentante observadór no reprezenta kandidatu sira, reprenzentante Komisaun Nasional Eleisaun, no seguransa PNTL nian halo akompañamentu ba prosesu preparasaun tomak iha kada Munisipiu.

“Informasaun ne'ebé espalla no fó sai husi elementu balun dehan buletin votus kuak ne'e hoax, la loos,” dehan nia.

Molok ne’e, Diretór Jeral STAE Munisipiu Vikeke, Honorio Kruz da Silva informa, hafoin verifikasaun ne’ebé hala’o husi STAE, reprezentante fiskais kandidatu PR na’in 16 no Polisia Nasionál Timor-Leste munisipiu Vikeke, identifika buletin votus balun la di’ak.

“Iha prosesu verifikasaun ita deteta iha material sensitive, buletin votus, hamutuk 11 mak la di’ak, tanba iha sia (9) tinta kona kandidatu balun no rua laiha númeru serial. Ida ne’e mak ita deteta, seluk di’ak hotu no kualidade di’ak,” informa Honorio ba jornalista Jornal INDEPENDENTE via telefone, Kuarta (16/03).

Hafoin identifika buletin votus ne’ebé aat ne’e, nia hatete, STAE sei tau karimbu kanseladu no sei la uza iha prosesu votasaun.

“Buletin ne’ebé mak ami deteta la di’ak ne’e ba iha sentru votasaun ami sei la uza, hasai tiha, sei tau karimbu kanseladu katak iha prosesu eleisaun ita sei la uza buletin ne’ebé mak aat ne’e,” nia esplika.