Governu ne’ebé lidera husi Primeiru Ministru Taur Matan Ruak deside hodi fó pontu toleransa iha 18 Marsu ba funsionariu no ajente sira hotu husi ministériu ka instituisaun estadu sira.

"Governu deside ona hodi fó toleránsia pontu iha loron 18 fulan-marsu ba funsionáriu no ajente sira hotu husi ministériu sira ka servisu sira ne’ebé dependente ba sira, nune’e mós husi institutu sira no organizmu integradu nian sira iha administrasaun indireta estadu nian, tanba volta dahuluk eleisaun prezidensiál nian," informa komunikadu ne’ebé jornalista jornál INDEPENDENTE asesu, Kinta (17/03)

Komunikadu ne’e esplika razaun fó pontu toleransia ne’e tanba votante barak mak halo ona resensiamentu iha sira-nia munisípiu orijen, ne’ebé iha mós kazu barak, mak fatin votasaun nian la’ós iha sira-nia hela fatin, nune’e votante sira sei presiza sai husi sira-nia hela fatin atu bele hala’o sira-nia direitu no devér polítiku no fila-fali mai sira-nia hela fatin.

Entretantu, desizaun ida ne’e tuir lei númeru 10/2015, loron 10 fulan Agostu ne’ebé determina loron sira hanesan feriadu nasionál no data ofisiál komemorativa sira ne’ebé prevee katak bele fó toleránsia pontu.

“Tanba motivu akontesimentu nasionál, iha kazu partikulár ida ne’e, kona-ba data ida eleisaun nian,” dehan komunikadu ne’e.