Segundu Ronde ElPre, INDDICA Fó Atensaun ba Kandidatu PR Asegura Labarik

By Agustino Gama Marsu 28, 2022 407
Diretóra Jéral INDDICA, Tereza Maria da Costa Freitas. Foto:Agostinho/INDEPENDENTE. Diretóra Jéral INDDICA, Tereza Maria da Costa Freitas. Foto:Agostinho/INDEPENDENTE.

DILI: Institutu Defeza Direito das Criansa (INDDICA) husu ba parte Komisaun Nasional Eleisaun (CNE) no Sekretáriu Tekniku Administrasaun Eleitoral (STAE) atu fó hanoin ba kandidatu Prezidente Republika ne'ebé iha possibilidade avansa ba segundu ronde, tenke tau atensaun ba labarik sira iha tempu kampaña.

Tuir Diretóra Jéral INDDICA, Tereza Maria da Costa Freitas hateten, durante kampaña eleitoral etapa dahuluk, tuir observasaun husi Institutu Defeza ba Direitu Labarik, nota, kandidatu Prezidente Repúblika maioria  mak involve labarik sira iha tempu kampaña.

Aleinde, labarik balun abandona prosesu aprendizajen no tenke husik hela eskola, tanba de'it sira nia kuriosidade, tanba iha kampaña fatin ne'ebé barullu ho musika, nune'e Labarik sira ba halibur hamutuk iha kampaña.

Nia dehan, ba asuntu nee, parte INDDICA halo ona rekomendasaun lubuk ida ba parte orgaun eleitoral, atu nune'e karik avansa ba segundo volta kandidatu sira iha ona konsensia moral atu evita labarik sira.

"Agora iha kampaña etapa dahuluk nian, ami halo relatoriu no halo rekomendasaun husi ami nia observasaun durante ne'e iha terrenu, ba CNE no STAE atu elebora hodi fó hanoin fila-fali ba kandidatu sira ne'ebé avansa ba segundu etapa nian, espera katak na'i ulun sira, iha ona konseitu moral no preparasaun diak atu oinsa labele involve labarik sira,"dehan nia ba Online INDEPENDENTE, iha nia kna'ar Fatin, INDDICA-MSSI, Kaikoli, segunda nee (28/03).

Ho nunee, INDDICA husu mós ba inan-aman sira atu evita labarik sira involve iha tempu kampaña, tanba iha situasaun kampaña halibur ema barak, ida nee mós sai risku tebes ba labarik sira.

"Iha risku boot ba labarik sira bainhira involve iha kampaña, durante ami observa iha terrenu katak, iha munisipiu balun labarik sira uza piloks ba sira nia isin, ida ne'e afeita tebes ba labarik nia saúde," haktuir nia.

Tanba nee, nia dehan, iha kampaña segundu volta mai, espera katak, situasaun sira ne'e iha, di'ak liu evita, atu labele mosu tan riksu boot ba labarik sira.

Maibé, liu-liu oinsa bele fó protesaun ba labarik sira.

Enkuantu, Diretóra nee akresenta, ba kandidatu Prezidente Republika ne'ebé iha possibilidade avansa ba segundo volta, bainhira iha ambitu kampaña tenke koalia mós papel ba Labarik sira nian.

"Ba ita nia kandidatu sira mós ami fó hanoin fila-fali durante hato'o mensajem ka materia kampaña nian, atu bele koalia mós papel ba labarik sira nian, karik sai prezidente Republika atu haree osamentu ne'ebé kabe ba labarik atu bele hare no bele promulga,”nia haktuir.

Diretóra nee akrsenta, kona ba dadus involvimentu labarik sira iha tempu kampaña, ne’ebé parte INDDICA rekolla, seidauk bele fó sai ba públiku ho razaun katak, sei halo relatoriu ba parte CNE, hafoin bele fó sai.

Entretantu, kandidatu Prezidente Republika ne'ebé iha possibilidade avansa ba segundu volta mak hanesan, kandidatu Prezidente Republika numeru sorteiu 14, José Ramos Horta no kandidatu numeru 6, Franisco Guterres Lú Olo.

Kampaña segundu volta nee sei hala’o iha loron 2-16 fulan-Abril tinan 2022.

Aleinde, eleisaun sei realiza iha loron 19 Abril tinan nee.

Rate this item
(0 votes)

Independente Digital TV