Ho nune’e, CNE haruka ona karta ba kandidatu Prezidente Repúblika sira no koalia ona ho reprezentante kandidatu no ekipa susesu sira atu hapara ona muzika provokativu iha kampaña.

Tuir CNE, artista sira bele kria muzika hodi apoiu sira-nia kandidatu maibé muzika refere tenke kontein asuntu edukativu.

Prezidente Komisaun Nasionál Eleisaun, José Agostinho Belo hatete, parte CNE hato’o ona ba kandidatu PR sira atu muzika sira ne’ebé toka no kanta durante kampaña ho kontiudu lori paz no dame.

“Ninia konteudu ne’e presiza muda, la refere ba ema ruma, la refere ba instituisaun ruma, fara mais kona-ba situasaun ida ke iha tendensia provokativu, tanba sira mai asina tiha ona paktu ba eleisan paz ninian, ha’u sente sira tenke konsidera ida ne’e, timoroan tenke firme iha pozisaun ida ne’e,” dehan José iha edifisiu CNE, Kolmera, Kinta (24/03).

Iha ronde dahuluk, nia dehan, mosu ona muzika ne’ebé koalia kona-ba manu, no iha mós kandidatu balun koalia kona-ba mannu mutin no mean, no iha posibilidade sei mosu muzika foun iha ronde daruak.

“Sai artista karik di’ak liu sai artista ne’ebé mak di’ak, kontribui ba nasaun, la’os provoka fali situasaun, Ha’u hanoin karta ba tiha ona loron rua liu ba, ohin reniaun mós ami toka nafatin, ha’u espera katak sira sei muda,” nia hatete.

José dehan, iha posibilidade ronde daruak iha kandidatu rua de’it, entaun presiza hatudu ona komportamentu ne’ebé di’ak ho reponsabilidade atu povu sente kalma hodi vota ba sira-nia Prezidente Repúblika.

Hatan kona-ba tanba sa mak CNE la hapara kedan muzika ne’e iha kampaña ronde dahuluk, nia dehan, iha altura ne’ebé CNE seidauk hatene, muzika ne’e mosu bainhira hahú kampaña.

“Tanba altura ne’e ita seidauk hatene muzika ne’e, manu ne’e, iha ka la’e, maibé kuandu hatene 2 no 3 Marsu mosu, ne’ebé kriativu timoroan ne’e furak tebes, maibé la’os kriativu ba situasaun ne’ebé bele provoka ne’e,” katak nia.

Iha fatin ketak, Dosente Universidade Nasionál Timor Lorosa’e (UNTL), Camilo Ximenes de Almeida konsidera muzika kona-ba manu mean, manu azul no zala ne’e la edukativu.

“Ha’u mak tama ekipa susesu kandidadu nian muzika ida ne’e ha’u so’e ba tasi laran tanba muzika ne’e la eduka militante sira, simpatizante sira no sei la atrai ema seluk atu vota ba ita. Tanba ba kampaña atu faan programa ne’ebé mak iha atu atrai ema seluk la’os atu duni fali ema seluk,” dehan nia iha kampus UNTL, Kaikoli, Kinta (24/03).

Nia konsidera muzika kona-ba manu, liu-liu lia-fuan ne’ebé hatete ‘mutin baku-fila’ la edukativu.

“Pior liu ema lider partidu ida ne’ebé fomozu tebtebes ba bidu hanesan labarik  kiik-oan ida, ha’u  hanesan sidadaun konsidera ida ne’e, deskulpa mais ladun gosta ida ne’e. Kampaña ne’e la’os festa no la’os hanesan dangdut, maibé kampaña ne’e atu hato’o planu tinan lima eleitu karik saida mak presiza tenke halo,” katak nia.