Primeiru Ministru hatete, governu mós haree hela oinsa atu hadia kondisaun estrada iha area rural hodi bele fasilita prosesu votasaun.

“Governu iha orsamentu haree ba eleisaun segundu ronde, ne'ebé orsamentu la sai problema ba iha festa demokrásia ida ne'e, ne'ebé governu nafatin esforsu atu eleisaun ba segundu ronde ne'e bele la'o di'ak,” dehan PM Taur hafoin enkontru semanal ho Prezidente Repúblika, Francisco Guterres Lú Olo iha palasiu prezidensial Bairo-pite, Kinta (24/03).

Iha oportunidade ne’e, PM Taur mós sita problema balun ne’ebé mosu durante eleisaun ronde dahuluk, liu-liu estrada ne’ebé difikulta povu ba vota no problema iha Sentru Votasaun Paralelu.

Primeiru Ministru, Taur Matan Ruak, promete sei halo esforsu hodi hadia estrada iha area rural atu bele fasilita eleitór sira partisipa iha votasaun ba eleisaun prezidensial iha ronde daruak ne’ebé tuir planu sei realiza iha 19 Abril tinan ne’e.

Taur dehan, governu haree hela kondisaun ne’ebé mosu no daudauk ne’e esforsu atu hadia estrada sira iha area rural.

"Ami hare hela, esforsu saída mak bele halo atu ajuda, liu-liu daudaun ne'e dezastre naturais estraga tiha estrada, bele fasilita segundu ronde,” dehan PM Taur.

Nia hatutan, STAE no CNE servisu maka’as ba preparativu ba ronde daruak nian no governu ninia apoiu mak oinsa sira-nia atividade bele la'o di'ak no reforsa seguransa iha sira-nia atividade ne'e atu labele iha tan problema.

Aleinde ne’e, Xefe Governu sei fó mós atensaun hodi rezolve problema ne’ebé mosu iha Sentru Votasaun Paralelu iha kapital Dili.

“Haree ba eleisaun foin dadauk liu ba ne'e, iha difikuldade sira balun iha sentru votasaun paralelu balun Sira ne'e, agora haree hela ida ne'e hanusa atu governu ajuda sira atu bele fila ba sira-nia fatin atu bele partisipa iha festa demokrásia ida ne'e,” dehan nia.