Nia haktuir, la promete halo estrada ka dada eletrisidade no buat seluk, tanba nee la’ós prezidente nia kompetensia. Maibé, iha dever atu mobiliza ministériu no governu atu tau-matan ba asuntu sira infraestrutura nian.

“Ha’u nu’udar Prezidente Repúblika la mai promete ba povu Atauru, tanba ne’e laos ha’u-nia servisu, maibé nu’udar aman ha’u sei bolu ministru ne’ebé toma konta atu halo portu no estrada,” nia dehan, iha Munisípiu Atauru, Domingu (6/3).

Nia dehan, nu’udar aman bolu atensaun ba ministru, prezidente la’ós nu’udar ema ministru ne’ebé kaer projetu ka kaer osan.

“Ha’u kuandu veta ba reaprova (Orsamentu Jerál Estadu) karik imi aloka de’it osan ba funsionáriu sira mate klamar. Imi la aloka osan ba estrada no portu Atauru nian. Di’ak liu ha’u reaprova haruka fila,” tenik Lere.

Nune’e, veteranu ne’e mós promete sei halakon pagamentu ba funionáriu mate klamar ne’ebé tuir nia, durante ne’e gastu osan barak.

Kandidatu ne’e esplika, bainhira tribunál la funsiona maka sei bolu Prezidente Tribunál Rekursu mas labele ba intervein, tanba separasaun podér, fó ninia apoia tulun ne’e mak bolu advokasia.

Nu’udar prezidente repúblika nia dever ida mak saida tenke kumpre konstituisaun no halo ema hotu-hotu tenke kumpre. Ema la bele viola, tanba konstituisaun mak ema hotu nia klamar no raan.

La Haluhan Povu Ain Tanan

Kandidatu Lere dehan, bainhira sai duni prezidente repúblika, ba povu Atauru no povu tomak ain-tanan no ema ki’ak nia sei la haluhan. Bainhira prezidente nia espoza hanesan inan ba nasaun sei tau matan ba asuntu ne’e.

“Ba Povu Atauru vota ba ha’u sai prezidente, ha’u sei la haluhan povu ain-tanan ho ema ki’ak sira. Ita hotu-hotu hatene, prezidente repúblika iha nia feen, la’os prezidente nia feentoba deit ne’e laiha, ba buka bisnis laiha, o nia laen sai prezidente repúblika nia feen tenke sai inan ba nasaun,” tenik nia.

Kandidatu ne’e fundamenta, inan ba nasaun tenke haree faluk oan ki’ak sira ho nia feto maluk sira, keta buat ruma naksalak iha feto maluk nia klaran haloos, tanba kultura no tradisaun Timor nian.

“Ha’u lakohi ha’u sai prezidente ema bolu ha’u-nia feen primeira dama, tanba ida ne’e mak ha’u hakarak hodi kandidatu aan ba prezidente,” tuir nia. 

Bandu Estudante-Labarik iha Kampana

Entretantu, iha Munisipiu Ermera, ekipa susesu Lere Anan Timur, inpoin regra hodi bandu estudante no labarik sira labele envolve iha kampana ne'ebé Lere halo iha Gleno.

Koordenador ekipa susesu Munisípiu Ermera, Julio do Rosario Lemos, husu labarik no estudante ne'ebé hamriik besik iha fatin kampaña atu fila ba uma, tanba lei bandu labele envolve iha kampaña politika.

"Antes ita-nia aman no maun boot to'o iha fatin kampaña ne'e, ha'u husu ba ita-nia oan ki’ikoan no estudante sira ne'ebé hamrik iha sorin-sorin fila ba uma, tanba lei bandu ita boot sira atu envolve iha kampana politika sira," dehan nia, iha kampu Glenu, horisehik.

Koordenador ne'e orienta kedas ekipa seguransa atu haruka labarik sira fila ba uma. Karik mai ho inan aman mós bele lori ba uma, depois mak inan-aman mai fali tuir kampna.

Observasaun diariu ne’e iha kampu, durante kampana iha Vikeke, Baukau, Lospalos, no Atauru labarik no estudante sempre envolve iha laran.