Enkuantu nia dehan, igualidade jeneru ne’e asuntu nasional ida iha Ministériu Soliedariedade Sosial no Inkluzaun no mós iha Sekretaria Estadu Igualidade no Inkluzaun, maibé iha Palasiu Prezidente nian, iha mós Gabineti Conjugue, ne’e responsavel husi Prezidente nia espoza, ne’ebé sei tau matan ba asuntu igualidade jeneru no minoritária.

“Ha'u hanoin Prezidente Republika sei fó atensaun ba asuntu ida ne’e duni, atu servisu hamutuk ho governu atu prioridade ba programa hirak ne’ebé relasiona ho igualidade jeneru,”dehan nia liuhusi kampaña door to door, iha kampu Futebool Aileu-Vila, segunda ne’e (7/3).

Nia hatutan, Timor-Leste nasaun ida ne’ebe foin ukun rasik an, maibée presiza fó atensaun tebes ba asuntu igualidade jeneru atu nunee feto sira labele hetan diskriminasaun iha sosiedade.

Tanba iha Konstituisaun RDTL garante mós ba igualidade jeneru no Lei eleitoral mós iha regras ba asuntu ida ne’e, nunee bele iha balansu ba asuntu igualidade jeneru.

“Hanesan nasaun ida ne’ebé foin mak ukun-an, ita nia nivel edukasaun sei iha diferensa boot entre alfabetizasaun no la’os alfabetizasaun no hasa'e nivel kapasidade atu interpreta lei ne’e ho di’ak,” haktuir nia.

Iha fatin hanesan, Koordenadora Postu Lekidoe, Joaninha da Cunha,  ho esperansa ba kandidatu Prezidente Repúblika ho numeru sorteiu 5 ne’e bele fó influensia ba governu atu tau atensaun no fó importansia liu ba igualidade jeneru.

Entretantu, Diretór Cmosaun Nasional Eleisaun (CNE), Nelio da Costa Guterres, hatete,  CNE nia servisu mak atu tau matan no halo supervizaun tomak ba kandidatu sira hamutuk na’in 16 ne’e.

“Ami nia observasaun no haree ba iha Kandidatu ho numeru sorteiu 5 ne’e, nia kampaña door to door lao diak tebes, laiha problema no tuir duni orariu ne’ebÉ iha, "dehan nia.

Nia hatutan,  aleinde, observasaun CNE niaN,  haree laiha labarik ne’ebÉ asiste kampaña ne’e.