“Ita tenke iha prinsipiu bainhira iha valor tanba edukasaun ne’ebe di’ak mai husi familia, hodi forma sosiedade ne’ebé di’ak liu no nasaun ne’ebé forte. Ho ida ne’e ita fó fiar ba ita-nia kandidatu Isabel sei halo buat di’ak ba povu iha tinan 500 mai, la’os tinan lima,” dehan nia, iha Suku Metinaru, Domingu (6/3).
Tanba ne’e, papel ba sidadaun sira nian oinsá mak kontribui ba boa-governasaun, atu asegura ba governante sira hodi labele halo korupsaun ba povu. Ne’e prinsípiu ba governasaun nian mak Isabel hakarak asegura hodi servisu hamutuk ho governu, lideransa sira no sosiedade hotu, tanba reskursu ne’e limitadu, tanba ne’e nia hakarak atinje rezultadu ne’ebé di’ak.
Iha fatin hanesan, Kandidata Presidente Republika, Isabel da Costa Ferreira hateten, karik povu fo fiar ba nia sei halo dezenvolvimentu ba povu nia moris di’ak liuhusi domin no karridade tanba domin no karridade sai hanesan xave ba dezenvolvimentu.
“Ha’u-nia kompromisu polítika kandidata-aan ba prezidente repúblika la’os atu hetan osan hodi serve de’it ba aan rasik, maibé hakarak sai inan ba nasaun hodi hadi’a netik povu ki’ik sira-nia moris,” tenik nia.
Isabel dehan, timoroan barak mak husu pergunta tanbasá mak laen primeiru ministru feen hakarak kandidata-aan ba Prezidente Repúblika. Hataan ba perguntas ne’e see hanoin de’it ba sira-nia aan, sira la mai ho podér politiku ne’e, tanba buat ne’ebé iha hanesan família natoon ona ba sira, maibé la hanoin de’it ba sira-nia familia, tanba hadomi povu ida ne’e rai ne’e, mak nia hakarak mós partisipa iha politika atu bele kontribui ba nasaun ne'e.
Tuir nia, razaun fudamental tanba hadomi povu no nasaun ne’e mak partisipa iha polítika atu bele kontribui dezenvolvimentu nasaun nian hodi liberta povu husi kiak ho mukit.
"See hakarak atu muda buat ida tenke tama iha vida politika, tan ne’e mak ha’u kandidata ha’u-nia aan, prezidente la’os ha’u-nia objetivu, prezidente hanesan meius ida de’it atu bele alkansa ha’u-nia objetivu, previlejiu ha’u la presiza,” tenik nia.
CNE Apresia Mini Kampaña
Komisaun Nasional no Eleitorál (CNE) apressia ba mini kampañia husi kandidata Isabel da Costa Ferreira, tanba kumpre regra kampañia nian ne’ebé submete ba CNE.
Tuir Diretor CNE Munisipiu Dili, Adelino de Oliveira Maia hateten, kandidatu númeru sorteiu 1 kumpre regra, envolvimentu labarik nian iha mini kampania nian ladún iha, maske iha maibé la’os envolve husi inan-aman sira mak lori, maibé kampañia ne’e realiza iha kampu ne’e, entaun komunidade sira ne’ebé besik sira bele hakat mai.
“Ami apressia tanba sira kumpre regra kampaña nian, tanba orariu ba kampania sei remata iha oras18:00, maibé sira termina antes ne’e, signifika sira kumpre regra husi CNE,” dehan nia, iha Suku Bidau, Kristu-Rei, Domingu (6/3).
Aleinde kumpre regra, iha mini kampaña nian husi númeru sorteiu 1 iha mós kandidatu seluk husi númeru sorteiu 5 mós kumpre regra ne’ebé submete ba iha CNE, inklui sira seluk no balun mak seidauk.
Iha sorin seluk, Kordenador Monitorizasaun Postu Administratviu Turiskai, Tito da Costa hateten, observasaun husi CNE iha Postu Administrativu Turiskai, mini kampaña ba kandidatu Isabel da Costa Ferreira di’ak tebes, maski tarde maibé tanba ho kondisaun estrada iha Tuirskai nian mak ladún di’ak.
