Kandidatu PR, Mariano Assanami Sabino Lopes hatete, knaar Prezidente Repúblika atu promove dialogu ho entidade hotu-hotu hodi rona direita saida mak sira presiza husi governu.

Palasiu prezidensial ne’e ba povu maubere, tanba prezidente ne’e eleitu husi povu atu servi povu, ho nune’e fatin ne’e ba povu tomak atu bele asesu iha loron saida de’it.

“Ha’u sai prezidente palasiu ne’e ha’u loke ba povu tomak atu hasoru prezidente hodi ko’alia, sira tama la presiza hatais formal, se mak kabala lipa, ain tanan ka uza sinelus tama de’it tanba palasiu ne’e sira nian,” dehan nia, iha Lautem, Domingu (13/03).

Assanami informa, obejetivu loke palasiu ba povu tomak atu kumpri knaar Xefe Estadu nian oinsá atu halo dialogu hodi rona entidade hotu-hotu nia lian hafoin foti desizaun ruma ne’ebé bele benefisia povu tomak tuir konstituisaun haruka.

Ba traballadór sira iha rai laran, presiza tebes kria kondisaun be’ebé dignu, maibé ohin loron sira hasoru problema oi-oin, salariu mininu tebes, kondisaun servisu ne’ebé la dignu, ho nune’e Xefe Estadu sei halo dialogu regular ho sira atu rona preokupasaun hotu.

Prezidente la’os atu kria kondisaun hotu-hotu ba povu tomak, maibé sei orienta governu atu hala’o sira nia knar hodi hadia povu nia moris tuir Planu Estrateziku Dezenvolvimentu Nasionál ne’ebé trasa ona durante ne’e.

Alende ne’e, Prezidente Repúblika mós hakarak atu halo dialogu regular ho joven hotu-hotu para orienta politika jerál ida atu governu bele trasa planu hodi responde jovem tomak ninia preokupasaun.