Kandidatu PR Mariano Assanami Sabino hateten, Prezidente Repúblika iha responsabilidade boot atu promove politika externa hodi hametin relasaun diak ho nasaun viziñu no nasaun Comunidade Paises Lingua Portugues (CPLP), iha aspetu sosial kultural, defeza seguran no ekonomia.

“Ita tenke promove politika externa hodi leno aan ba politika rao laran, ita presiza servisu hamutuk ho CPLP, hametin relasaun diak ho nasaun viziñu sira no nasaun sira iha reziaun,” dehan nia, iha Baukau, Domingu (13/03).

Assanami informa, servisu hamutuk ho nasaun hotu-hotu la’os atu haree de’it ba problema sosial no kultural de’it, maibé tenke halo servisu diplomasia ne’ebé haree liu ba asuntu ekonomia ho nasaun sira ne’ebé durante ne’e servisu hamutuk ona durante ne’e.

Timor agora loke embaixada iha fati-fatin ne’e la’os atu fahe de’it previleziu ba malu hodi gasta osan povu nian saugati, loke embaixada ne’e tenke haree vantajen politika ba nasaun no povu ne’e saida, sekarik embaixada sira ne’ebé loke la fó benefisiu ba nasaun di’ak liu taka. 

“Ita loke embaixada sira para buka dalan ita investe iha ne’eba, no buka dalan ema mai investe iha ne’e,” dehan nia.

Prezidente Repúblika iha papel importante atu kria politika jeral ida hodi kria kampu servisu hodi hamoris futuru ne’ebé di’ak liu.