Konsellu Fundadór RONETIL, Laurentino Alves hatete, kampaña eleitorál hanesan rekezitu prinsipal ida ne'ebe estadu halo hodi fó oportunidade ba kandidatu hotu aprezenta sira-nia planu, programa no atividade prinsipal ne'ebé sira atu halo bainhira eleitu.

Maibé, nia dehan, importante mós ba kandidatu no ekipa susesu sira atu evita envolve labarik sira iha kampaña.

“Bainhira iha prosesu kampaña eleitorál nia laran mak akontese partisipasaun labarik ne’e ita bele a nota hanesan erru ka violasaun direitu labarik, tanba labarik sira seidauk bele hola parte iha ambiente polítiku,” dehan Laurentino ba jornalista jornál INDEPEDENTE liu husi WhatsApp, Segunda (31/01).

Bainhira iha duni partisipasaun labarik sira, nia hatete, Ronetil sei lista hanesan deskobrementu prátika negativu ne'ebé orgaun eleitorál sira tenke fó atensaun hodi hadia iha futuru.

“Konserteza bainhira iha prosesu kampaña eleitorál mak deskobre partisipasaun labarik iha kampaña, Ronetil sempre lista, a nota iha relatóriu monitoramentu ba eleisaun prezidensiál no mós eleisaun parlamentár, no mós submete ba iha orgaun eleitorál estadu nian hodi foti medida ba rezolve problema hirak ne’e,” dehan nia.

Molok ne’e, Prezidente Komisaun Nasionál Eleisaun (CNE), José Agostinho da Costa Belo husu ba kandidatu PR sira atu hasai lia-fuan ne’ebé di’ak no edukativu durante kampaña eleitoral.

“Tanba nia uniku pesoál, ema bolu dehan reprezenta Timor-Leste ba li’ur mós, ne’ebé iha ne’ebá ko’alia kedas katak tenke uza lia-fuan sira ne’ebé di’ak no edukativu.”

Nia hatutan, kandidatu sira mós presiza evita lia-fuan hirak ne’ebé bele fó impaktu ba unidade nasionál.

“(hasai) Lia-fuan ida ne’ebé la sobu ita, lia-fuan ida ne’ebé la lori ita, atu fahe timor-oan sira no lia-fuan sira ne’ebé ko’alia halai ba sobu nasaun, unidade nasionál,”

CNE, nia hatutan, iha responsabilidade moral hodi hato’o ba kandidatu sira-nia ekipa no ko’alia mós kandidatu rasik bainhira sira hasai lia-fuan ne’ebé la serve.