Prezidente CNE, José Agostinho da Costa Belo hateten, Austrália seidauk halo resenseamentu eleitorál no atualiza baze dadus.
“Austrália foin lalais direitu hanesan Portugal, Londres no Koreia Súl, maibé sira-nia estadu halo alerta ida momentu pandemia. Entaun, deslokasaun ita nian ba iha ne’ebá seidauk no agora iha ona hanoin para estabelese sentru votasaun ka lae,” dehan nia, iha edifisiu CNE, Kolmera, Sesta (28/1).
Nia dehan, CNE diskute hela tanba seidauk halo resenseamentu, entaun presiza mós haree prosedimentu legál sira, iha posibilidade atu estabelese eleisaun prezidensial ka lae, maibé timoroan iha Australia hakarak loos atu partisipa.
“Seidauk iha desizaun ho loloos bele estabelese ka lae. Ita haree tok prosesu ba oin, ita bele halo sentru votasaun iha ne’ebá, maibe ita mós kumpre regra autoridade nasaun ida ninian,” tenik José.
Nia relata, CNE sei ko’alia ho Ministeriu Negosius Estranjeiru Koperasaun (MNEK) no CNE kontaktu embaixadór hodi haree posibilidade atu realiza eleisaun ka lae.
“See posibilidade bele loke, ita bele haree, maibé rekezitu sira hanesan rejistu presiza haree, para ita hatene ema hira mak iha ne’ebá, Maibé Koreia Sul, Portugal no Londres fiksu ona,” nia informa.
Iha fatin hanesan, Diretor Jeral STAE, Acilino Manuel Branco hateten, STAE konklui ona resenseamentu eleitoral no atualiza baze dadus iha loron 14 Janeiru 2022.
Nia dehan, agora iha hela faze ida hodi halo espozisaun lista territoriu tomak nivel suku no embaixada sira ne’ebé halo resenseamentu eleitoral no atualiza baze dadus.
“Maibé loron 14 Janeiru kuandu ita konklui provizoriu purvolta rihun 876-resin, maibé atu hateten deit ne’e dadus provizoriu,” dehan nia.
Nia hateten, tanba agora produz hela lista espoziasaun atu taka iha suku, públiku bele halo reklarasaun ba haree ninia dadus, depois STAE sei halo fali korresaun antes atu públika ofisialmente iha 17 Fevereiru 2022, iha Jornal da Repúblika nu’udar númeru ofisial ne’ebé sei hola parte iha eleisaun 19 Marsu 2022.
Nia hateten, durante ne’e problema laiha tanba lei eleisaun ne’ebé iha ona ne’e liuliu regulamentu sira tulun tebes orgaun eleitoral rua hodi halo ninia knaar no lori fó solusaun ba problema sira balun ne’ebé akontese iha pasadu.
