Lere dehan, iha loron 2 Fevereiru 2022, sei entrega farda militar iha Kuartel Jeral F-FDTL, Fatuhada. Tanba ne’e, fila ba vida sivil hakarak serve estadu ho povu dala ida tan iha Prezidente Republika.
“Hau husu hau-nia reforma ba vida sivil, mas buat ne’ebe ha’u sei bele atu serve estadu ha’u bele serve. Hau-nia kandidatu ba Prezidente Repúblika 2022-2027 se ita-nia povu fó bensaun ba ha’u,” dehan Lere iha Sentru Formasaun Treinu, Metinaru, horisehik.
Nia dehan, riku-soin ne’ebe durante eis-Tenente Jeneral iha mak serve nasaun no povu. Tanba ne’e, prontu atu kadidatu ba prezidente republika hodi kompete ho lider politiku sira seluk.
“Ha’u-nia riku no hau-nia di’ak maka serve nasaun no povu. Hanesan mós ho imi, buat seluk laiha, imi-nia di’ak no imi-nia riku maka serve nasaun. Serve imi-nia povu. Imi sira ne’e maioria jerasaun patriota, imi tenke hatudu imi-nia komportamentu, imi-nia hahalok, no imi nia liafuan, atu bele suporta malu atu lori instituisaun ne’e ba oin,” dehan nia.
Nia esplika, ne’e hanesan ona loron ikus hodi hamriik hanesan vida militar, maibe juridikamente iha 2 Fevereiru 2022, eis-Tenente Jeneral sei hatais farda fitun tolu hodi entrega hela farda ba komandu foun hodi lidera fali instituisaun militár.
“Lolos ba fitun haat, mas buat hotu la’o tuir lei tenke kumpre. Tanba ne’e, ha’u bele entrega hikas ba ha’u-nia komandu foun imi-nia aman Jeneral Falur Rate Laek, maibe la signifika ha’u atu husik ona instituisaun ne’e no sei abandona institusiaun ne’e, tanba ha’u mós fo ha’u-nia kontribuisaun makaas, ha’u lori ha’u-nia fuan sorin ba servisu iha fatin seluk, ha’u lori ha’u-nia fuan sorin nafatin hamutuk ho imi,” hakotu nia.
Tuir ajenda, Eis-XEMFA, Tenente Jeneral F-FDTL Tito da Costa Cristovão Lere Anan Timur, hamutuk ho militante sira iha sede kandidatura Pantai Kelapa, iha loron 1 Fevereiru (ohin), sei ba iha Komite Sentral Fretilin (CCF) hodi foti kartaun militante partidu FRETILIN.
Tanba, Prezidente Repúblika, Francisco Guterres Lú Olo foti ona desizaun hodi ezonera Tenente Jenerál Tito da Costa Cristovão Lere Anan Timur husi kargu, promove Majór Jenerál Domingos Raul Falur Rate Laek ba Postu Tenente Jenerál.
Molok nee, Xefe Estadu Maior Jeneral FALINTIL-Forsa Defeza Timor Leste (F-FDTL), Tanente Jeneral Lere Anan Timur hatete, Xanana moral laiha bainhira apoiu ema seluk sai PR.
“Ha’u dehan hanesan ne’e, to’o agora ha’u seidauk deside (kandidata-aan ba PR), maibé ha’u-nia maun Xanana tula liman ba ema seluk... See tula ba Falur, Aluk, Maunana, ne’e ha’u konkorda, maibé tula fali ema seluk ha’u hatete ba ha’u-nia maun morál laiha. Hau deziste ona, maun foti aas liu fali nia duke ha’u. Maun la hatene katak uluk iha ai-laran ne’e ha’u atu fó ha’u-nia vida ba ita-boot atu moris, maibé ida ne’ebé o tula liman ne’e hakarak ita-boot mate,” dehan Lere.
Nia afirma, see Xanana tula liman ba veteranu balun husi ai-laran hanesan Aluk, Mau Calo ka Falur, nia sei apoiu no sei la tau iha problema.
“Maibé tanba prezidente nee ami mai husi ai-laran, nee kuadru superior sira nee, maun Xanana avansa tiha ona, depois tuir mai Taur mak avansa ona, depois tuir mai Lú Olo mak avansa ona, agora se ita dehan hau mós iha direitu, maibé se lakohi pasiensia, maibé hau Fretilin nafatin,” deklara Lere.
