Ekipa susesu husi kandidatu Prezidente Repúblika númeru 2, Francisco Guterres Lú Olo, hato’o asuntu kona-ba hasa’e salariu minimu ba trabaladór sira no fó servisu ba universitariu ne’ebé hetan valor as liu.
Sekretariu Jeral partidu Fretilin promete atu husu ba governu konstitusional daualu hodi hasa’e salariu minimu ba trabaladór sira.
"Iha ona proposta balun ne'ebé ha'u hakarak aprezenta, maibé ha'u presiza elebora, iha ida ne'ebé importante tebtebes, hakarak bolu atensaun oitavo Governu atu konsidera hodi estuda, haree halo nusa atu sira rezolvove problema saláriu minimu ida ne'e," dehan Alkatiri iha Kampaná ba dala 10 kandidatu Lú Olo iha kampu futebol Ainaro Vila, Munisipiu Ainaro, Segunda (11/04).
Tanba, nia dehan, daudauk ne’e vida ekonomia mós karun ba beibeik tan ne’e presiza haree solusaun ba trabaladór sira nia salariu minimu, tantu traballadór sira iha empreza ka estadu ne'ebé manan saláriu mínimu.
Nia dehan, bainhira salariu mínimu traballadór sira nian ne'e atu aumenta, empreza sira mós sei hakilar, maibé sei adapta atu haree estadu no empreza sira nia responsabilidade ne'e atu to'o iha ne'ebé.
Alkatiri espera katak iha tinan ida ne’e governu bele hetan ona solusaun balun hodi hasa’e salariu minimu.
Servisu ba Universitáriu ho Valor Di’ak Liu
Prezidente Partidu Libertasaun Popular (PLP), Taur Matan Ruak ne’ebé reprezenta kandidatu Lú Olo lidera kampaña ba dala 10 iha Ainaro promete sei fó servisu ba universitáriu sira ne'ebé hetan valor di'ak liu ka exelente.
"Mellores alunu sira iha universidade, ami mós deside atu alunu sira ne’ebé di’ak liu iha universidade, Governu ajuda sira hetan servisu,” hatete Taur.
Taur dehan, koligasaun ka Plataforma Entendimentu entre partidu FRETILIN, PLP ho KHUNTO deside mós atu fó bolsu estudu ba alunu Ensinu Báziku Sentrál to’o nivel Sekundáriu sira ne’ebé mak hetan valór di’ak liu.
“Iha klasifikasaun primeiru, segundu no terseiru lugar, sei atribui prémiu ba sira, nune’e bele enkoraja no motiva liu tán sira badinas estuda,” dehan Taur.
Iha oportunidade ne’e, Taur mós esplika kona-ba governu atual ne’ebé hamosu tan ona programa bolsa da mae jerasaun foun.
Programa ne’e, tuir Taur, sei hahú uluk iha Munisípiu Ainaro, Bobonaro no Rejiaun Administrativu Espesial Oekusse-Ambeno.
“Ida ne’e, oinsá? La’ós hanesan ida uluk, bolsa da mãe ba inan sira ne’ebé isin-rua ona, fulan-fulan nia simu $15.00. Kuandu labarik moris, nia inan la simu ona, labarik mak simu fali $20.00 to’o tinan-neen (6) mak foin para. Ne’e atu halo saida? Atu kombate má nutrisaun iha ita-nia rai laran. Sosa manu-tolun, sosa susu-been fó ba sira. La’ós halo lia-mate, lia-moris, la’ós ida ne’e. Imi labele ba halo fali lia-mate, lia-moris,” Taur esplika.
