Kandidatu PR númeru 1, José Ramos Horta hatete, bainhira nia hetan vitoria iha 19 Abril, signifika Timor-Leste hahú ona loron foun ida.
“Ita inaugura tempu foun ida ke ita haklean no defende ita-nia konsituisaun, haklean ita-nia demokrásia, ita-nia estadu direitu demokrátiku no ita-nia liberdade,” dehan Horta iha kampaña eleitoral iha Tasi Tolu, Dili, Tersa (12/04).
Bainhira hetan fiar, Horta dehan, nu’udar PR nia sei haree mós problema estrada, eletrisidade, ekonomia no infra-estruturas sira seluk.
“Atu ida ne’e akontese Prezidente Repúblika agora labele servisu mesmesak, se ita hili governu ida, lideradu maun boot Xanana. Se ha’u laiha parseiru ida hanesan maun boot Xanana no partidu sira seluk ne’ebé mak apoiu ita daudaun, ne’e laiha buat barak mak Prezidente Repúblika bele halo tanba bele hetan blokeiu iha Parlamentu Nasionál,” dehan Horta.
Tan ne’e, nia hatutan, tenke hahú kedas haree oinsa mudansa maioria iha Parlamentu Nasionál no oinsa hetan governu lejitimu Governu dasia.
Tanba, Horta konsidera governu daudauk ne’e ne’ebé lidera husi Primeiru Ministru Taur Matan Ruak laos governu konstituisionál.
Tan ne’e, Horta husu atu vota ba númeru 1 iha 19 Abril, maibé tenke hanoin daudaun ona mós atu manan maioria iha Parlamentu.
“Iha fulan Abril ida ne’e ka fulan Maiu hetan maioria foun karik. Tanba bele iha deputadu balun ho konsiensia ne’ebé mak mai husi PLP, Khunto no Fretilin no matenek atu haree lejitima Parlamentu Nasionál ho diálogu harii kedas govenu foun.”
“Maibé atu governu foun ne’e mak prepara eleisaun foun ke bele iha 2022 ka 2023 konforme deputadu sira.”
“Maibé keta haluha Prezidente Repúblika iha podér konstituisionál atu dizolve Parlamentu Nasionál, demite governu, keta haluha ida ne’e. Iha sistema semi prezidensialista ita nian, poder ida mak Prezidente mak ne’e,” nia dehan.
