"Ita hotu hatene katak, ohin dadersan parte husi STAE Munisipiu Dili nian, hala'o serimonia distribuisaun materia sensitivu ba iha sentru votasaun ne'ebé hola parte iha Dili, ita halo distribuisaun urna hotu ona,"dehan Diretór CNE, Munisipiu Dili, Adelino de Oliveira Maia, ba Online INDEPENDENTE, iha knar fatin, segunda ne’e.
Nia hatutan, total sentru votasaun iha Munisipiu Dili hamutuk 130 ho nia estasaun hamutuk 237.
Aleinde, nia dehan, ba eleitór rihun 4.032 ne’ebé rejistu iha sentru votasaun Paralelu tolu iha Munisipiu Dili nafatin vota iha fatin refere.
Entretantu, tuir dadus, eleitór iha teritoriu laran tomak ne’ebé STAE rejistu hamutuk 859.613 no sentru votasaun iha 1.200 no estasaun hamutuk 1.500.
Enkuantu, distribuisaun materia sensitivu no urna ba sentru votasaun sira iha Dili no mós Munisipiu sira seluk, hetan seguransa husi Polisia Nasional Timor-Leste no mós ofisial supervizaun husi STAE no CNE.
Garante Eleitór Sei Vota ho Esperansa La Hamosu Konflitu
Diretór CNE Munisipiu Dili, Adelino de Oliveira Maia hateten, parte orgaun rua CNE no STAE garante nafatin katak, iha loron votasaun, buat hotu sei la'o ho di'ak no sei la mosu tan problema ne'ebé akontese hanesan iha eleisaun prezidensia dahuluk nian.
"Ba iha orgaun eleitoral rua ne'e, ita garante nafatin hodi hein katak, aban (19/04), loron votasaun buat hotu sei lao tuir ita hotu nia esperansa katak, sei la mosu problema hanesan foin dadauk iha primeira volta," dehan nia.
Nia hatutan, iha esperensia foin lalais, iha sentru votasaun balun mosu problema, ezemplo, hanesan iha Fomentu iha prosesu kontagen la'o hela iha Grupo balun uza arma mai halo ameasa iha fatin refere.
"Ita hein katak, ho esperensia ne'ebé liu ba, ha'u hanoin parte seguransa mós halo avaliasaun oinsa atu haforsa tan seguransa iha sentru votasaun sira ne'ebé konsidera risku,"nia dehan.
Ho nune’e, nia espera katak, iha loron votasaun aban (19/04), sidadaun hotu sei ezerse sira nia direitu votu ho diak.
Enkuantu, Kandidatu Prezidente Republika Na'in rua ne'ebe avansa ba iha segundo volta mak hanesan, Kandidatu Prezidente Republika José Ramos Horta ho numeru sorteiu ida (1) no Kandidatu Prezidente Republika Francsico Guteres Lú Olo ho numeru sorteiu rua (2).
