Ministra Negosiu Estranjeiru no Kooperasaun (MNEK), Adalzija Magno hateten, kona-ba ba eleisaun iha diaspora ne’e só Austrália mak ekipa husi TL labele aplika.

“Fatin hotu-hotu hanesan Portugal ho Reinu Unidu mak ita halo ona resenseamentu kompletu. Ema barak loos ba halo resensiamentu, mas Austrália seidauk,” dehan nia, Palasiu Governu, Segunda (24/1).

Nia dehan, iha Austrália, governu TL tenta hela maibé susar atu ba tanba sira tenke halo kuarentena no mos labele sai arbiru, nune’e imposivel ema atu ba rejistu.

“Ami tenta maibé sira iha ne’e mak susar atu ba tamba ba ne’ebá sira tenki halo kuarentena depois sira labele naran sai ne’e ema kuandu lockdown ne’e imposivel ema atu mai registu,” dehan nia.

Lokcdown Impede STAE-CNE

Ministra Negósiu Estranjeiru no Kooperasaun (MNEK), Adaljiza Magno hatete resensiamentu iha diáspora la’o di’ak, maibé Austrália mak situasaun lockdown hela de’it, entaun Sekretáridu Tékniku Administrasaun Eleitorál (STAE) ho Komisaun Nasionál Eleisaun (CNE) la konsege ba maibé eleisaun tenta atu halo.

Nia dehan, resensiamentu iha diáspora la’o ho di’ak, barak mak ba halo rejistu atu troka sira nia kartaun, barak liu iha Inglatera kuaze besik mill itall, depois MNEK kontaktu asuntus konsoladus atu hatene númeru konkretu.

Nia hatete, iha Portugal tanba situasaun pandémia maibé embaxada Timor nian rua ne’e esforsu aan duni atu halo resensiamentu iha ne’eba.

“Austrália nian tanba situasaun sira lockdown hela de’it, entaun STAE-CNE la konsege ba, maibé eleisaun sei tenta atu halo, maibé agora depende mós ba situasaun iha Austrália se sira permite ita halo,” tenik nia.

Molok ne’e, MNEK Adaljiza Magno hatete prontu koopera ho Sekretariadu Tékniku Administrasaun Eleitorál (STAE) atu halo resensiamentu eleitorál ba Timoroan iha diáspora atu bele tuir votasaun eleisaun prezidensiál ne’ebé sei realiza iha fulan Marsu tinan 2022.