Partido tolu ne’e halo deklarasaun ofisiál, iha Otél Novu Turismu, segunda horsehik

Partido Libertasaun Popular (PLP) ses aan husi koaligasaun tanba mosu diferensia ideia ho FRETILIN kona-ba presidénsia meza Parlamentu Nasionál. Tanba ne’e, partidu mais-votadu FRETILIN konvida kedas Partido Demokrátiku ne’ebé antes ne’e hola parte iha inkluzaun.

Sekretáriu Jerál Partidu FRETILIN, Marí Alkatiri esplika akordu ne'ebé partidu tolu asina la'ós automatikamente koligasaun ona maibé ida ne'e hanesan inísiu ida atu forma koligasaun iha loron hirak tuir mai. Tanba tuir eis Primeiru Ministru ne’e katak partidu tolu ne’e asei ajusta nia programa.

Maski la’o ho partido PD ho KHUNTO, Alkatiri informa sei kontinua halo dialogu ho partidu CNRT ho PLP ba intrese nasaun no povu nian.

Iha fatin hanesan, Presidente Partidu Demokrátiku Mariano Assanami Sabino hatete, partidu demokratiku ho nia prinsipiu ida hatete, Ba O Timor Ami Maubere Oan Prontu Servi”.

La’o ho prinispiu ne’e, PD prontu ona halo koaligasaun hamutuk ho FRETILIN no KHUNTO.

“Ha’u iha fatin-fatin deklara ona ba povu tomak katak ema iha nasaun ne’e hotu importante tanba hahu husi presidente republika mai to’o dasa rai ita hotu importante hodi servi rai ida ne’e,”dehan Assanami.

Entretantu Konsellu Superior KHUNTO, José Dos Santos Naimori Bucar hatete, solusaun di’ak mak avansa ho koaligasaun. Tanba ne’e, nia husu ba povu atu kontinua kolabora ho governu foun hodi harii pás no estabilidade.

Akordu ne’ebé partidu tolu ne’e asina, sita mós kona-ba atu garante lista kandidatu presidénsia meza parlamentu nasionál, estrutura presidénsia meza parlamentu nasionál no kompozisaun membru governu sei fahe tuir proporsionalidade.

Partidu koaligasaun ne’e mak sei define primeiru ministru no primeiru ministru indizitadu mak sei halo dialogu ho partidu koaligasaun sira kona-ba membru governu sira.

Antes ne’e, Alkatiri dehan sei haklot estrutura governu, atu bele efisiensia liu.

Tuir planu, tersa ohin (5/9) tama ona ba primeira plenaria parlamentu nasionál hodi  halo tomada pose ba membru IV lejislatura foun.