Prezidente Partidu Khunto, Armanda Berta dos Santos hatete, fatin turizmu sai nu’udar prioridade ba partidu Khunto atu dezenvolve bainhira kaer ukun.

Tuir Berta, dezenvolvimentu fatin turizmu aleinde dada turista sira, bele mós dada investor sira hodi mai investe iha Timor Leste.

“Turizmu importante, ita sei hadia fatin sira par oinsa bele atrai investidor sira bele mai investe iha ita-nia nasaun,” dehan Berta iha kampaña partidu Khunto ne’ebé realiza iha Manatutu Vila, Munisipiu Manatutu, Kinta (27/04).

Nia hatutan, Khunto iha planu no programa lubuk ne’ebé hakerek iha livru manuál nian, tan ne’e Khunto presiza povu nia votus atu bele implementa.

Planu hirak ne’e, nia hatutan, tuir nafatin planu estrarezia dezenvolvimentu nasionál 2011 to'o 2023.

Tuir Prezidente Khunto ne’e, ninia preokupasaun boot mak povu Timor Leste tenke moris iha fatin ne'ebé dignu.

Tan ne’e, nia dehan, nia parte hein iha loron votasaun kadeira Khunto nian iha Parlamentu Nasionál bele aumenta.