Konseleiru Partidu Unidade Dezenvolvimentu Demokratiku (PUDD), Mario de Sousa Guterres da Silva ‘Nunura’ hatete, durante tinan 20 ona governu kontinua mantein salariu minimu $115 tan ne’e bainhira PUDD hetan fiar hodi kaer governu sei hasa’e salariu minimu husi $115 ba $250.
“Ida ne’e ita koalia laos retorika, ita tenke tau duni iha pratika, tanba ita hatudu ona iha Parlamentu Nasional hanesan proponente hato’o proposta ba governu iha diskusaun OJE 2022 konsege aumenta osan idozu husi $30 ba $50 kada fulan, tanba ne’e ita ba ukun agora, ita sei hadia lei salariu minimu ba traballador husi $115 hasa’e ba $250 kada fulan,” dehan Nunura iha ninia intervensaun politika iha komisiu aberta PUDD iha Darisula, Munisipiu Baukau, Sabadu (23/04).
Nia dehan, PUDD sei tau prioridade hodi halo revizaun ba lei salariu minimu atu nune’e bele dignifika trabaladór Timor-oan sira.
“Durante ne’e ita haree traballadór barak servisu kada fulan simu salariu minimu mak $115, ida ne'e konsidera diskriminasaun, tanba ne’e ita ukun sei defende hadia lei salariu minimu,” katak nia.
Iha fatin hanesan, Prezidente Komisaun Nasional PUDD, Alberto Araujo afirma, lei salariu minimu sai ajenda importante ba PUDD atu hadia.
Ida ne’e, nia hatutan, laos retorika maibé sei tau iha pratika bainhira governa iha tinan 2023 to’o 2028, tanba PUDD rasik defende ona osan idozu iha tinan 2022.
Aleinde salariu minimu, nia hatutan, PUDD mós sei hasa’e subsidiu ba idozus husi $50 ba $200 kada fulan.
Razaun hasa’e valor subsidiu ne’e, tanba Alberto dehan, inan-aman sira-nia dedikasaun mak Timor Leste hetan ninia independensia.
“Idozu sira uluk fó kontribuisaun liu husi elisaun, referendu, mak ohin loron ukun aan. Sira merese duni simu osan idozu hodi valoriza sira-nia kontribuisaun, tanba (bainhira) sira mate ona, sira sei labele goza direitu ne'ebé sira oferese iha tempu referendu. Tanba ne'e PUDD ukun sei implementa subsidu ba idozu kada fulan simu mós $200,” dehan nia.
Tuir nia ida ne’e la’os retorika de’it maibé sei implementa duni tanba PUDD hatudu ona iha Parlamentu Nasionál hodi propoin hasa’e osan idozus husi $30 ba $50.
“Ita hatudu ona rezultadu inan-aman sira rona no sente ona, tanba proposta hasae osan subsidiu idozu sira, uluk simu osan $30, agora aumenta ona $50 kada fulan,” dehan nia.
