“Ohin ita hatene ona nia (Xanana) fila mai Timor lori rejultadu ida di’ak biar sedauk final maibe rejultadu ida ne’ebe diak hatudu katak ita nia hakarak atu reafirma soberania tasi Timor konsege duni ona,”dehan Alkatiri iha Otél Novu Turismu, segunda horsehik.

Nia haktuir katak, iha eleisaun foin lalais ne’e  kuandu hetan rejultadu finál husi eleisaun parlamentar nia rasik reafirama hodi fó konfiansa tomak ba Xanana ho nia ekipa negosiadór atu bele kontinua halo negosiasaun ba fronteira tasi Timor ho pais viziñu Australia.

“Agora ha’u rasik kontente ho rejultadu ne’e husi ne’e ba oin kontinua bele reforsa ho kapasidade seluk maibé lideransa kompadre Xanana nian kontinua lidera negosiasaun fronteira tasi no rai maran nian,”dehan Alkatiri.

Iha fatin hanesan mós Presidente Partidu Demokrátiku, Mariano Assanami Sabino hatete, hanesan jerasaun foun ohin loron hamahan aan iha partidu kontinuadór apresia tebes ho esforsu lider tuan sira nian liu-liu Maun Bo’ot Xanana.

Maun Boot Xanana ne’ebé ho fuan bo’ot hodi servi nafatin povu no rai ida ne’e iha tempu di’ak no defisil nia laran.

Nia hatutan, hanesan jerasaun foun ne’ebé mak durante ne’e hetan orden husi nia superior sira no kumpri to’o ohin loron tanba ne’e koalia kona-ba Fronteira martíma Partidu Demokrátiku fó nia kakorok iha rezime Soeharto nian tanba ne’e atu luta ba soberania Timor laiha rezerva no la hakiduk.

“Ha’u apresia no lori kuadrus no militantes partidu demokrátiku fó kongratulasaun ba esforsu Maun Boot Xanana ho nia ekipa negosiasaun sira hotu,”dehan Assanami.

Tribunál Internasionál Arbitrazen anunsia ona katak Timor-Leste ho Australia bele rejolve disputa delimitasaun fronteira maritima liu husi dalan lei internasionál (UNCLOS). Sei foti desizaun finál iha fulan-Outubro 2017.