Deputadu Bankada KHUNTO, Luis Roberto da Silva hatete partidu hanoin ona atu lori nia ema sira ne’ebé envolve iha Governu konstitusional daualu hodi halo juramentu iha Ramelau.

“Sim, ida ne’e kompromisiu ida ne’ebé partidu KHUNTO halo durante ami halo kompaña eleitorál, bainhira partidu KHUNTO mak hetan fiar husi povu hodi tuur iha membru governu no Parlamentu Nasionál tenke ba juramentu iha Ramelau,” dehan Luis iha PN, Kuarta (01/07).

Vise Prezidente PN ne’e dehan, lolos juramentu ne’e sira halo ona antes, maibé tanba impase politika ne’ebé naruk, nune’e sira seidauk konsege halo.

Tan ne’e, hafoin hakat liu impase politika ne’e no estrutura governu kompletu ona, Partidu KHUNTO kompremetidu katak sei halo duni jurmentu iha Ramelau.

“Iha tempu badak nia laran ami sei tuur hamutuk hodi deside sa data mak atu ba halo jurmentu iha Ramelau, juramentu iha Ramelau hodi mai bele halo sira-nia kna’ar ho didi’ak, ho justu, buat ne’ebé mak sira nian atu han, sira han, buat ne’ebé mak povu nian, povu nian,” dehan nia.

Nia akresenta, Partidu KHUNTO nia  komprimisiu hatur tiha ona, tanba ne’e hotu-hotu sei ba juramentu, laiha membru Governu ida husi Partidu KHUNTO mak lakohi ka rezeita atu ba juramentu iha Ramelau.

“Sira hotu-hotu sempre hakarak, tanba iha komprimisiu interna partidu KHUNTO nian, tanba ha’u fiar katak sira sei la rezeita atu halo juramentu iha Ramelau, tanba ha’u mós nu’udar autór ba Partidu KHUNTO nian ida, ne’ebé komprimisiu klaru tebes ona, sira tenke kumpre sira-nia dever,” dehan nia.