Prezidente PLP Taur Matan Ruak dehan durante nia mandatu iha Prezidente Repúblika vizita suku 442 veteranu barak husu muda estatutu ba lei veteranu ho klaru atu dignidade veteranu ne’ebé luta ba libertasaun.
“Ha’u mak ukun sei muda estatutu lei veteranu nian atu valoriza imi nia luta tanba ita haree iha Austrália ho Amérika nian veteranu ne’e ema konta, maibé Timor nia veteranu ema la konta”, dehan nia iha komísiu polítika iha suku Afoloikai-Munisipál Vikeke,horisehik.
Nia observa, estatutu lei Veteranu no kombatente la loos no inventa barak liu tan ne’e, tenke hadi'a hodi labele halo veteranu balun simu osan no medalla iha balun surat tahan de’it ne’ebé hamosu hirus malu.
Aleinde ne’e, PLP kompromete mós atu fó bolsu estudu ba kada uma kain no harii uma iha Dili (Perumahan) atu fó moris dignu ba povu kbiit laek sira.
“PLP sei fó apoiu materiál konstrusaun sei tula rai henek, kalén nia folin $5 imi selu de'it dolar $2 osan la iha fó karau hodi fó han PNTL no F-FDTL halo oinsá para imi nia uma tenke di'ak tanba imi terus barak ona”, dehan nia.
Eis Prezidente Repúblika ne’e hateten, Partidu Libertasaun Populár (PLP) tenke ukun iha tinan ida ne’e tanba partidu FRETILIN ho CNRT ukun ona, maibé povu sei kontinua moris iha kiak no mukit nia laran,
Tanba ne’e, nia husu Populasaun tenke hili tuir nia konsensa tanba votu ida determina povu nia vida durante tinan lima.
“Imi Watulari –oan sira dehan mate iha bandeira FRETILIN nia hun, maibé imi nia uma kalén sira ne’e prega de'it pregu frizu no imi nia estrada de'it aat tebes, ida ne’e mate ba bandeira hun manan saida nian”, dehan Prezidente PLP.
Iha fatin hanesan, Komisaun Nasionál Polítika PLP Ajé Belo Marçal hateten, CNRT no FRETILIN ukun durante tinan sanulu resin ona, maibé estrada iha área izoladu kontinua aat nafatin.
Durante sira nia ukun, nia dehan, dezenvolvimentu ekonomia, Infraestrutura la'o de'it área urbana no ukun na'in sira maka sente.
“Ita haree ekonomia iha ita nia rai laran depende liu ba osan mina nian”, tenik nia.
Kampaña datoluk PLP iha Munisípiu Vikeke ne’e la'o iha pás no estabilidade tanba hetan seguransa másimu husi Polisia Nasionál Timor-Leste ho hetan observadór PDHJ no STAE.
