Liu husi média sosiál Dionísio Babo atuál Ministru Administrasaun Estatál (MAE) posta fotografia no hateten, “Reunião alargada MOKATIL (Movimento dos Camponeses de Timor-Leste) ho maun boot KAY RALA XANANA GUSMÃO nudar Protector MOKATIL hodi continua halo dezenvolvimento nacional no husu compromisso ba agenda MOKATIL ba futuru. Hudi-Laran 16:00, Loron 18/06/2017”.

Hanesan mós ho Ilídio Ximenes atuál Sekretaria Estadu Polítika Formasaun Profisionál no Empregu (SEPFOPE) ne’ebé posta fotografia hodi hateten, “MOKATIL nebe organiza husi Arsenio da Silva Pereira fo ninia apoia total ba Maun Bot Xanana ohin iha hudi laran 18/6/2017…”

Relasiona ho postajen ne’e, organizasaun Uniaun Agrikultura Munisípiu, ne’ebé hamahan-aan iha MOKATIL husu ba Dionísio Babo no Ilídio Ximenes atu labele politiza prezensa protetór Maun Boot Xanana Gusmão iha konsolidasaun MOKATIL nian.

“Ami husu… Dionísio Babo Soares no Ilídio da Costa Ximenes atu labele buka manipula no politiza fali ba eventu konsolidasaun MOKATIL ne’e ba sira nia interese no interese polítiku liu husi média sosiál”, dehan reprezentante MOKATIL, Alberto Martins Guterres, iha Sede Knua Buka Hatene (KBH), Kolmera-Dili, horisehik.

Nune’e, sira mós husu ba Prezidente MOKATIL, Arsénio Pereira da Silva atu labele politiza Maun boot Kay Rala Xanana Gusmão nia figura no naran ba sira nia interese pesoál.

Sira husu mós ba partidu polítiku sira atu labele polítika MOKATIL.

Ne’e duni, apela ba kamponeza sira atu hametin nafatin nasionalizmu, unidade nasionál no estabelese nasionál hodi kontribui ba iha prosesu dezenvolvimentu nasionál iha rai doben ne’e.

Alberto esplika, objetivu konsolidasaun nasionál ne’e atu to’os na’in sira bele mai hasuru no koñese liu tan protetór kamponeza sira nian Kay Rala Xanana Gusmão, la’ós prezidente partidu CNRT. Nia mai nu’udar lider nasaun atu bele tau matan ba to’os na'in sira iha futuru aban bainrua nian.

Nia hakle'an liután, eventu ne’e MOKATIL konvida mós lider nasionál na’in rua seluk hanesan maun boot Mari Alkatiri no Mau-Huno, maibé tanba kestaun tékniku koordenasaun nian, tanba ne’e sira nain rua la konsege hola parte iha konsolidasaun nian.

Hataan ba kestaun ne’e, Dionísio Babo Soares, partidu CNRT respeita MOKATIL no nunka politiza organizasaun ne’e.

“Ami nunka hanoin atu politiza. CNRT nunka hanoin”, dehan nia, via telefone.

Nia esplika, fotografia ho liafuan ne’ebé eis Sekretáriu CNRT ne’e posta iha média sosiál tanba iha momentu hanesan nia mós akompaña protetór Kay Rala Xanana Gusmão ba konsolidasaun MOKATIL nian.

Entretantu, Ilídio Ximenes responde katak, ema balun mak tenta atu politiza sira ninia postajen iha média sosiál, maibé sira laiha intensaun atu politiza ka partidária organizasaun MOKATIL.

Tanba MOKATIL apoiu maun boot Xanana Gusmão hodi hili nia sai protetór ba interese nasionál nian, la’ós atu fó apoiu ba partidu CNRT.