Iha kampaña daruak Partidu Demokrátiku iha Munisípiu Baukau, ba Militante no simpatizante Prezidente PD, Mariano Assanami Sabino hatete, PD hanesan partidu Jerasaun foun hakarak atu investe makas iha setór Edukasaun.
Setór Edukasaun, Assanami sai hanesan xave importante, tanba ne’e kuandu hetan fiar husi povu atu kaer ukun, PD kompromete sei kria kréditu ba estudante hahú husi primária to’o nivel superiór atu bele asesu kréditu hodi bele seluk eskola.
PD observa, ohin loron estudante barak mak garantia Universidade Nasionál Timor Lorosa'e (UNTL) atu ba kontinua estudu, maibé kuandu la liu tenke para eskola.
Estudante sira hakarak atu tama ba iha universidade privada sira, maibé ekonomia família fraku entaun sira labele kontinua estudu.
Tanba ne’e polítika PD hakarak atu fó kréditu kuandu eskola hotu mak bele selu fali osan estadu ho fuan ne'ebé ki’ik.
“Polítika Partidu Demokrátiku sei fó kréditu ba estudante Timor oan hotu atu bele asesu kuandu sira nia eskola hotu mak sira bele selu fali osan estadu kada fulan $30”, hatete Presidente PD, Mariano Assanami Sabino iha nia diskursu daruak, iha munisípiu Baukau, (21/06).
Nia dehan, atu diversifika osan estadu nian labele rai de'it, maibé tenke investe iha setór produtivu sira hanesan edukasaun atu nune’e aban bain rua sira mak bele esplora fali osan sira ne’e hodi dudu dezenvolvimentu nasionál.
Entretantu iha fatin hanesan, Presidente Komisaun Polítika Nasionál (CPN), Adriano Nascimento hatutan, atu garantia kualidade setór edukasaun iha nasaun ne’e hakarak ka lakohi tenke investe makas hodi hasa’e saláriu profesór nian.
Nia hatutan ohin loron profesór sira nia saláriu sa’e ne’e tanba PD nia esforsu. Tanba ne’e profesór sira bele hetan ona saláriu ne'ebé di'ak maibé la to’o iha ne’e kuandu povu fó fiar ba PD atu ukun iha períodu ida ne’e PD garantia sei hasa’e tan saláriu profesór sira nian atu nune’e sira mós bele moris dignu hanesan mós funsionáriu sira seluk.
Dezenvolve Baukau
Partidu Demokrátiku (PD) nia programa ne’ebé importante iha kampaña Eleisaun (ElPar), períodu 2017-2022, hakarak dezenvolve Munisípiu Baukau sai segundu sidade iha Timor-Leste, hafoin Dili.
Presidente PD Mariano Assanami Sabino hatete, se ElPar PD manan sei dezenvolve di'ak liu tan Munisípiu Baukau sai sidade no hadi'a estrada iha Munisípiu Baukau liga ba Suku no Aldeia sai Aspal. Tanba realidade kondisaun estrada ne'ebé oras ne’e sei aat.
Nia dehan, maski oras ne’e governu liu husi Ministériu Obra Publika (MOP), maibé seidauk tama to’o suco no aldeia.
“Kompaneiru sira, PD iha programa primeiru mak tau fali Baukau nudar sidade segundu iha Timor laran. Hadi'a estrada sai aspal iha Munisípiu Baukau laran”.
PD nia programa seluk, hakarak atu dada bee ba to’o komunidade sira uma ida-idak, maibé be ne’e bee hemu kedas no dezenvolve fatin turizmu sira iha Munisípiu Baukau laran tomak.
