Nia dehan, jerasaun tuan sira hakarak kaer tan ukun dala-rua, Ramos Horta okupa ona Prezidente Repúblika, Lu Olo mós okupa ona prezidente parlamentu nasinonal okupa ona prezidente Repúblika mas agora hakarak rekandidata.

"Ha'u lakohi sai Jeneral no sai Prezidente Repúblika dala-rua. Ha'u lakohi fo fatin ba ema seluk, ha'u sei fó fatin ba ha'u-nia oan ida jerasaun patriota ida Prezidente Repúblika ba 2027 to'o 2032," dehan nia, iha Suai, horisehik.

Tuir nia, sira mak sa’e mós la halo milagre. Sira mesak de'it mós la halo milagre so hamutuk mak sei bele halo buat ruma, tanba sira-nia ukun to'o ona 2022 Timor mak hanesan ne'e nafatin, impase politika, eleisaun antesipada, Timor nunka mais lao ba oin.

"Ha'u hakarak kandidata-an husi ha'u-nia partidu FRETILIN, maibé ha'u-nia maun Mari Alkatiri, Sekretariu jeral FRETILIN mak taka dalan ba ha'u. Rekandidata fali Lu-Olo atu sai Prezidente 2022 ate 2027, maibé ha'u la hakiduk, ha'u ba oin nafatin," dehan Lere.

Lori veteranu rezistensia nia naran, matebian sira-nia naran, foho lulik, rai lulik nia naran maka Lere kandidata-aan ba Prezidente Repúblika, maibé tinan lima mai hakarak dudu jerasaun foun, la'os taka dalan beibeik.

Ema ida labele hakat liu raan ne'ebé fakar Ema ida la hakat liu foho Ramelau ne'ebé ke aas, foho Matebian, foho Kablake, ema ida labele liu. Labele lori osan, lori lian bosok atu manan.

"Sé mak lori osan, lori lian bosok atu manan buat ruma raan ho isin ne'ebé nakfakar sei babeur liman ain sei tuk, tanba rai ida ne'e lulik. Ita sosa ho isin ita labele halimar ho povu nia vida," dehan nia.

Bobonaru-Kovalima Kria Rekonsiliasaun

Nune’e, nia husu ba sidadaun Munisípiu Bobonaru no Kovalima ne'ebé besik iha area fronteira tenke kria rekonsiliasaun, atu labele hamosu konflitu, tanba maluk sira iha sorin mesak Timor-oan.

" Bobonaru no Suai, imi inan-aman sira ne'ebé ke iha fronteira rekonstrusaun ida ne'e importante liu," dehan nia.

Nia dehan, tanba saida mak hakarak rekonsiliasaun, tanba rona populasaun iha rai Maliana no Suai sei bolu malu balu milisia balun Aitara, Besi Merah, naran oioin de'it, mas sira ne'ebé agora  hamutuk biar Aitara ka Besi Merah, agora iha ne'e mesak Timor-oan, iha direitu hanesan.

"Tenke rekonsilia malu, ita-nia maluk Timor-oan sira iha sorin la'os tasi mak haketak, ita rai maran mak haketak ita," dehan nia.

Lori Ruin Don Martinho Mai TL

Kompromisiu kampaña eleitoral Lere Anan Timur sei lori Saudozu Bispu Don Martinho Lopes nia ruin mai Timor-Leste (TL).

Nia dehan, asume duni knaar hanesan Prezidente Repúblika maka antes tinan rua Don Martinho Lopes nia ruin to'o ona Timor, tanba ne'e husu veteranu sira hamutuk atu bele halo buat ruma.

"Ita nia aman Dom Martinho Lopes nia ruin sei iha Postugal ne’ebá… Ha'u promete ha'u prezidente Repúblika, tinan rua, antes tinan rua ninia ruin iha Timor-Leste ona," dehan nia.

Lere esplika, Don Martinho mak fo Iis mai Maun boot Xanana, husi ne'e mak ba Avo Xanana pasa estratejia Unidade Nasional.