“Iha ne’e Ainaru, rai ha’u-nia tiu Naimori ho ha’u tia Berta nian. Tia berta ne’e ami na’in rua amor malu. Ne’e duni, ita-boot sira KHUNTO bele vota ba ha’u, ha’u-nia amor Berta la hirus. Ha’u-nia amor mós Deputada Olinda, siak teen loos. Olinda mos hateten, nia sei vota ba ha’u,” dehan Horta, iha Kampu Futebol, Postu Administrativu Ainaru, Kuarta (9/3).
Nia dehan, bainhira hetan konfiansa husi povu maka sei hahú uluk diálogu ho partidu sira seluk iha parlamentu no sira ne’ebé laiha fatin iha parlamentu, para ba oin taka no hadi’a violasaun konstituisaun ne’ebé na’i ulun rai ida ne’e nian viola dala-barak.
Iha fatin hanesan, Prezidente Partidu CNRT, Kay Rala Xanana Gusmão, sente triste no laran kanek tebes tanba ema ida no timoroan ida ne’ebé hakerek konstituisaun iha 2001 maka fila viola fali konstituisaun.
“Aprova tiha mak sai RDTL ema nia oan ne’e ba estuda direitu sai tiha matenek sama fali konstituisaun, ida ne’e mak ha’u la simu,” dehan nia.
Nia hateten, dala ida deit karik bele dehan la ho intensaun, maibé dala tolu ne’e ho intensaun. Hatene mak halo nafatin violasaun konstituisaun, nia mak hakerek no nia asinatura iha ne’ebá, ne’e mak labele simu.
“See lei inan ita viola, lei oan sira la vale ona. Tanba ne’e, mosu hada’u kadeira iha parlamentu, lei sira seluk atu halo ida ne’e, la vale hotu tanba lei inan ne’e ita viola ona, la vale ona,” tenik Xanana.
Nia fundamenta, tanba ne’e hasoru malu iha ne’e atu fó lembra ba hotu-hotu katak agora tama ona ba referendu daruak.
“Opsaun rua, ita vota sala, ita nia rain monu ba rai kuak, ita vota ba ema ne’ebé loos hodi hametin fali estadu direitu demokrátiku, referendu kedua, importante tebes, iha rai lulik ida ne’e ita iha ai-riin haat (4) mak Prezidente Repúbliku, Parlamentu Nasionál, Governu, Tribunál Rekursu lahuk ona,” nia informa.
Nia reforsa, iha tinan lubuk ida liu ona ai-riin ne’e lahuk, estadu direitu demokrátiku anin huu boot monu deit ona, tanba krize iha leten.
“Konstituisional ninian iha 2006, 2007 ita iha krize ida ne’e mak mai afeta ema baku malu, oho malu, estraga malu, ohin loron krize boot iha leten, ba ukun nain sira ne’ebé kaer poder atu ukun rai ne’e, sira mak halo krize,” nia esplika.
Nia akresenta, povu timor hatudu nia maturidade, matenek iha krize ne’e nia laran la book malu, tanba hatene katak katuas no ferik sira hanorin ba jovens sira kalma nafatin ida ne’e mak furak.
Entretantu tuir observasaun Jornál INDEPENDENTE kampaña kandidatu Prezidente Repúbliku númeru 14, José Manuel Ramos Horta la’o ho hakmatek, tanba hetan seguransa masimu Polisia Nasionál Timor-Leste munisípiu Ainaro, aliende ne’e hetan observadór, Komisaun Nasionál Eleisaun (CNE), PDHJ nune’e mós observador Internasionál ne’ebé akreditadu husi STAE.
