Xanana Gusmão ho Lere Anan Timur membru CCF mai husi Ai-laran. Lú Olo ne'ebé ohin loron rekandidatu aan tan, ne'e la'os membru CCF.
Nia esplika, dala-ruma maun Xanana ko’alia dehan Lere mak membru CCF balun laran moras, hanoin katak la konsidera sira. Konsidera membru CCF hotu ne'ebé sei moris no ne'ebé uluk komanda funu, maibé terus la hanesan.
"Ha'u ho maun Xanana sobrevivensimentu membru Komite Sentral mai husi ai-laran. Maun Xanana nia terus ha'u haree ho matan. Ha'u-nia terus maun Xanana haree ho matan, la'os ema seluk mak konta. Tanba ne'e, biar ami rua maibé ami hotu hamutuk nafatin," dehan nia, iha Suai, horisehik.
Nia fundamenta mai husi ai-laran komandu ema na'in tolu, Xanana, Taur Matan Ruak, Lere Anan Timur. Saudozu Daitula no Saudozu Konis Santana mak mate antes atu tama ba ukun aan.
"Ita-nia maun Lú Olo ohin loron Prezidente Repúblika atu rekadidata aan tanba ne'e la'os membru Komite Sentral. Ha'u mak la militar karik ohin loron ha'u mak prezidente Partidu Fretilin," dehan nia.
Nia akresenta, la'os ema seluk, mas povu fi'ar Lere kaer forsa situasaun sei hakmatek, tanba ne'e mak Fretilin haruka Lere ba kaer forsa sai Xefe Estadu Maior Jeneral no durante tinan 20 resin, mak ohin loron hamriik iha ne'e la'os militar ona.
Lere militar reformadu ho fitun tolu, maibé Jeneral nafatin hotu-hotu rona bainhira sai militar biar hatais farda tula deviza, maibé sempre deklara aan iha públiku ema Fretilin, kontra konstituisaun kontra mós estatutu militar.
"Ha'u brani dehan katak ha'u Fretilin. Ha'u hein para ema ruma foti ba lia ema ruma atu kritika maibé hotu hotu nonok. Ha'u hanoin kandidatu independente hakarak sai kandidatu ba ha'u nia partidu ne'ebé fakar ha'u-nia raan, maibé ha'u atu kandidata aan ba Fretilin nian Fretilin rasik taka dalan ba ha'u. Mari Alkatiri rasik mak taka dalan ba ha'u," tenik Lere.
Lere sees lori veteranu hotu nia naran hakarak kandidatu aan ba Prezidente Repúblika, maibé nafatin iha Fretilin, Mari Alkatiri matenek ida karik bainhira tur hamutuk ho Lú Olo mós avansa Lere mós avansa, nia podia la husi A ka B, maibé nia apoia nafatin Lú Olo.
"Ha'u dehan obrigadu ha'u sai oan ki'ak iha Fretilin nia-laran, maibé oan ki'ak nunka moris mesak, oan ki'ak nia maluk mak inan-aman sira ne'ebé ita hamutuk iha ne'e" teknik nia.
Lere fundamenta inan aman sira ne'ebé iha patriota no nasionalista sira ne'ebé iha ne'e la'os partidu ida de'it, la'os organizasaun ida de'it mak halibur malu, iha ne'e partidu oioin, organizasaun oioin mak ohin loron hamutuk iha ne'e, iha ne'e partidu balun la pertense maibé mesak Timor-oan.
Fretilin hahu 1975 baze apoia rahun, Fretilin atu lakon mohu, maibé Timor la mate no Fretilin la mohu, maibé presiza iha ulun ida no iha diresaun ida. Baze apoia rahun Fretilin ninia komite sentral nu'udar mata-dalan mate mohu hela na'in tolu de'it.
"Na'in tolu ne'e Ida mak ita nia avo Xanana, ida mak ita nia Matebian Ma'Hunu, ida tan mak Saudozu Fernando Cay. Sira na'in tolu de'it no subar fatin mak loro-sa'e ne’ebá iha rejiaun I ponta leste, sira na'in tolu de'it labele halo buat Ida, tenke reorganiza fila-fali ita nia rezistensia nasional," nia afirma.
Diresaun Fretilin laiha, Fretilin mós labele moris, tenke iha ulun ida atu bele la’o ba oin, entaun iha 1981 halo konferensia nasional reorganiza fali rezistensia, halo kontinuidade saida mak Fretilin husik ba sira na'in tolu, maibé 1980 ida mate tan Saudozu Fernando Cay mate tan hela sira na'in rua de'it.
"Maibé ita nia maun na'in rua Xanana ho Ma'Hunu Karataiano moral la tun, moral forte nafatin, tanba ninia soldadu no Fretilin liman kroat ho povu nia liman kroat ida-rua sei iha sira na’in rua nia sorin. Entaun 1981 loron 3 Marsu reorganiza ita nia konferensia nasional," nia salienta.
Nia reafima, atu reorganiza konferensia nasional presiza membru Komite Sentral foun atu hamutuk ho sira na'in rua atu komanda Timor nia funu ba Libertasaun. Iha 1981 eleze tan membru na'in 9 ba segunda jerasaun nian hamutuk ho sira na'in jerasaun dahuluk.
"Na'in 9 ohin loron na'in 8 la hamutuk ona ho ita sira-nia raan fakar ona ba rai ida ne'e no ba povu ne'e, hela ha’u mesak de'it Lere Anan Timur. Ha'u-nia númeru sorteiu 8 la'os númeru matematika, númeru reprezenta ha'u kamarada, eroi saudozu na'in ualu ne'ebé mate ona," dehan nia.
Reprezenta ne'e, númeru ida ne'e lulik, númeru ida ne'e todan ne'e ran no isin sira na'in ualu mak tula liman ba Lere atu kandidata aan ba Prezidente Repúblika.
