Nia hato'o lia hirak ne'e bainhira halo kampaña dialogu iha Aaldeia Leogore, Suku Holpilat, Postu Adminitrativu Maukatar, Munisipiu Covalima. Ne’e duni, bainhira sai prezidente Repúblika sei  kontinua luta ba povu nia moris hodi kore povu husi mukit nia laran.

"Ha'u hamriik iha ne'e hanesan kandidatu Prezidente Repúblika ho hanoin ida katak, ha'u tenke kontinua kontribui ba nasaun ne'e, ukun rasik mai ha'u la'os fim ba luta ne'e bainhira povu sei moris hela iha mukit nia laran", dehan nia, Kuarta (9/3).

Nia hatutan, luta ba ukun rasik aan sei kontinua ho objetivu ne'ebe diferente oinsá mak bele hadi’a povu nia kondisaun.

"Ita agora iha liberdade atu halo buat ne'ebe tuir Ita-nia hakarak, tanba demokrasia, maibé ita-nia kondisaun vida seidauk muda husi mukit nia laran no povu sei tanis ba ukun an ne'e", tenik nia.

Nia dehan, oportunidade  tenke iha hanesan ba iha povu, laiha grupu ne'ebe espesiál liu, tanba durante luta ba ukun rasik aan ne'e hotu-hotu luta ba ukun aan.

"Ha'u hatene Ita sira ne'e iha familia lakon vida barak iha funu nia laran ba ukun rasik aan, tanba ne'e mak Ita hotu iha direitu tomak atu joga previlejiu ba ukun an ne'e fo mai", katak nia.

Hili PR Autor ba Mudansa.

Ekipa susesu kandidatu Constâncio, Ady Jose Andre Pinto hateten, tempu to'o juventude sira atu hili kandidatu Presidente Repúblika ne'ebe garante mundansa no estabilidade no sai autor ba juentude sira.

"Ba maluk joventude sira tempu ona ita jiventude rasik no inan-aman sira hodi deside ba ita-nia aan rasik atu hili Prezidente Repúblika ne'ebe garante katak juventude tenke sai ona autor ba mudansa no estabalidade husi aldeia, suku to'o munisipiu no nasional," dehan nia.

Nia dehan, kada tinan Prezidente Repúblika troka beibeik maibé sei nafatin nune'e, tanba ne'e tempu to'o atu juventude sira hili Prezidente Repúblika ida ne'e matenek no iha kapasidade ba ukun.

Enkuantu, Kandidatu Prezidente Repúblika, Constancio Pinto iha mehi boot ba foin-sa'e timoroan sira mak hakarak atu transforma sira sai matenek hodi dezenvolve Timor-Leste sai nasaun dezenvolve hanesan mós nasaun seluk.

Nia dehan, bainhira povu Timor-Leste fó poder ba nia Prezidente Repúblika, sei tau prioridade aas liu ba edukasaun liu-husi nia influensia nu'udar Prezidente Repúblika sei servisu hamutuk ho governo ne'ebé de’it mak ukun atu bele haruka estudante ho kuantidade boot ba eskola iha nasaun dezenvolvidu sira hanesan alternativa ida ba nasaun nia futuru.

Hakruuk ba Konstituisaun

Kandidatu Prezidente Repúblika, Constancio Pinto promete bainhira povu fo fiar sai prezidente Repúblika sei hakruuk ba Konstituisaun hodi garante estabilidade ba funsionamentu Estadu Direitu Demokratiku.

"Karik imi fó fiar mai ha'u sai prezidente Repúblika, ha'u sei halo buat ne'ebe Prezidente sira seluk la halo. Ha'u sei hakruuk ba Konstituisaun Repubilika demokratika de Timor Leste (K-KRDTL) lei inan," dehan nia.  

Nia hateten, Prezidente Repúblika tenke hakruuk ba Konstituisaun hodi garantia ba estabalidade nasional no funsionamentu normal Estadu nian.  

"Ha'u sei servisu ho orgaun soberania hotu-hotu, husi  governu, parlamentu nasional no mos sei koopera hamutuk ho sosiedade sivil, juventude, organizaun naun governamental, Igreja Katolika no instituisaun religioza sira seluk no hakbesik-aan ba povu ne'ebé mukit", tenik nia.

Enkuantu Kandidatu Prezidente ne'e baihira eleitu sei halo dialogu ho lider sira no povu hodi bele hatene situasaun iha rai-laran.