Prezidente Konsellu Polítiku Nasionál (CPN ) Adriano do Nascimento promete ba povu Zumalai katak kuandu Partidu Demokrátiku PD manan sei la defende ukun nain sira atu halo intervensaun ba área justisa.
Tuir nia, PD hanoin tenke hapara intervensaun polítika husi ukun na'in bainhira ema boot ruma ba justisa komesa intervein dehan sistema justisa la’o lad'iak.
Polítika PD, nia dehan, kuandu kaer ukun halo loos justisa ho justu ba ema hotu.
“La'ós ema ki'ik oan ne’ebé maka na'ok manu maka tama komarka maibé boot sira ne’ebé nauk osan karon ba karon la’o ba mai di'ak hela ne’e la loos”, dehan nia hafoin halo kampaña iha Postu administrasaun Zumalai, Kovalima, Sábadu (01/07).
PD hakarak kria boa governasaun liu husi kombate korrupsaun Koluzaun no Nepotizmu (KKN) ne’ebé tenke hahú husi Órgaun soberanu.
Kombate korrupsaun, nia dehan parlamentu Nasionál tenke hasai imunidade ba ukun na'in sira ne’ebé deskonfia ona komete korrupsaun atu hataan iha tribunál.
Tanba ne’e, nia dehan, PD manan laiha duvida atu hasai imunidade ba membru governu no parlamentu ne’ebé deskonfia envolve iha korrupsaun.
“PD Manan tenke halo lei anti korrupsaun para se maka na'ok uza lei hodi prosesa ba tribunál no ita mós sei halo planu estratéjiku oinsá maka kombate korrupsaun iha Timor Leste”, dehan nia.
Tanba , nia dehan, hahú husi primeiru governu too sestu Governu , ukun na'in balun intervein setór justisa ne’ebé sei dezenvolve kapasidade juis no prokuradór no advogadu sira atu labele monu ba intervensaun bainhira foti desizaun.
Harii Institutu La-Sama
Prezidente Pártidu Demokrátiku PD, Mariano Assanami Sabino kompromete bainhira kaer ukun hari’i Institutu lideransa ho naran Fernando La-Sama iha Munisípiu Ainaro.
Harii institutu LASAMA, nia dehan, atu fó valór ba saudozu La-Sama ne’ebé ko'alia, “Hare malu ba, tanba nasaun presiza imi” ne’e hatudu valór rekonsiliasaun.
“PD manan no neineik-neineik, sei hakarak harii institutu ida ne’ebé aprende kona ba lideransa, aprende kona ba oinsá atu sai ukun, oinsá tau aas dignidade estadu nian aas liu duke dignidade ninian”, dehan ASSANAMI.
Assanami dehan, bainhira PD ukun hodi harii institutu, la'ós ba militante no simpatizante PD nia oan sira mak kontinua eskola iha institutu ne’e, maibé povu nian oan husi fatin hotu-hotu bele eskola iha ne'ebá.
Militante Partidu Haat Afila Ba PD
Militante husi Frente Revolucionária de Timor-Leste Independente (FRETILIN), Congressu Nasionál Reconstrução Timorense (CNRT) no Asosiasaun Sosiál Demokrátiku Timorense (ASDT), ho Partidu Dezenvolvimentu Nasionál (PDN) afilia ba uma lisan Partidu Demokrátiku PD, hodi hamutuk lori pártidu Demokrátiku (PD) ba Eleisaun Parlamentár.
“Agradese ba família foun ne’ebé ohin tama mai, hakat mai husi Partidu FRETILIN, ASDT, CNRT no PDN, imi fila mai imi nia uma lisan. Imi la mai atu sai bainaka iha ne’e (PD). Imi ohin tama mai Partidu Demokrátiku, sai kedas uma na'in”, dehan nia.
Assanami mós kontinua husu nafatin ba estrutura PD iha Timor laran tomak, atu kontinua esforsu no servisu maka’as iha kada munisípiu, postu adminsitrativu hodi tuku povu nia odamatan esplika ba sira atu nune’e labele vota ka tu’u sala ba PD.
