Kandidatu PR hamutuk ho Prezidente CNRT, Kay Rala Xanana Gusmão, ne’ebé durante tempu kampaña identiku ho ‘Manu Aman Mutin’, ohin sei ‘kokorek’ ba dala ikus nia iha Dili.
Sekretáriu Jerál Partidu CNRT, Francisco Kalbuadi Lay informa, ohin kandidatu PR Ramos Horta sei realiza ninia kampaña dala ikus nian iha Tasi Tolu.
Tan ne’e husu ba kuadrus militantes, simpatizantes no movimentu ne’ebé apoiu Horta atu organiza hodi ba konsentra hamutuk iha Tasi Tolu iha tuku 10 dader.
Kalbuadi husu mós ba kuadru, apoiante no militante sira hotu atu la’o ho disipliña, respeitu orden públika, evita provokasaun no sees an husi violensia.
“Ita tenke hadomi ema hotu, domin ba ema hotu, Ha’u apela dala ida tan ba hotu-hotu atu respeita sinais tranzitu no ema seluk hotu, atu bele fó liberdade ba ema hotu uza estrada ne’e di'ak, atu bele kria paz no domin iha festa demokrasia eleisaun prezidensial 2022-2027 ba ita-nia kandidatu José Ramos Horta,” dehan Kalbuadi liu husi konferensia imprensa iha Sede Nasional Partidu CNRT, Bairo dos Grilhos, Segunda (14/03).
Kona-ba númeru massa ne’ebé tuun, Kalbuadi hatete, dezde tinan 2007 to’o ohin loron, kapital Dili sai nu’udar baze ba CNRT.
“Aban iha Tasi Tolu ita bele akumula ema karik 50 mill ka 60 mill de’it. Se ita mobiliza no koloka didi’ak, ema bele liu,” dehan nia.
Iha fatin ketak, relasiona ho kampaña loron rua ikus kandidatu PR sira iha kapital Dili, Xefe Departamentu Relasaun Publika Komandu Jeral PNTL, Superintendente Xefe Armando Monteiro informa, PNTL prepara ona unidade tolu hodi apoiu Komando PNTL Dili asegura kampaña loron 15 no 16 Marsu iha kapital Dili.
Nia hatutan, unidade tolu ne’ebé sei tuun hodi apoiu PNTL Dili mak Unidade Espesial Polísia (UEP), Unidade Polisia Maritima (UPM) no Unidade Patrolamentu Fronteira (UPF).
“Atu evita insidente ne'ebé akontese iha semana dahuluk no semana daruak iha kampaña eleitoral ne'e, sai ona referensia no lisaun ida ba ami, tanba ne’e ita hatene katak efetivu iha Komandu PNTL munisípiu Dili hatun hotu ona, maibé la sufisiente. Ohin (horseik) ofisiálmente Komandante Komandu Operasaun Nasional hasai ona diretiva espesiais ba departamentu servisu no Unidade iha Komandu Jerál, sei hatun tan Unidade tolu,ne'ebé destakadu iha kapitál Dili ho maximu hodi asegura seguransa iha loron ikus,” dehan Armando liu husi konferensia imprensa iha Kuartel Jerál PNTL, Kaikoli, Segunda (14/03).
Nia dehan, dezde inisiu PNTL garante seguransa ba kampaña no eleisaun, maibé presiza mós kooperasaun no apoiu husi militante, apoiante no simpatizante sira, inklui ekipa susesu kandidatura sira nian, nune'e bele garante liu tan kampaña ikus iha Dili tuir dalan demokrasia.
“Ita hotu tenke kumpre regra no normas prosedimentu ne'ebé mak orgaun eleitoral fó sai tiha ona atu nune'e ita hotu garantia katak kampaña ikus iha Dili sei la'o ho di'ak tuir dalan demokrasia,” katak nia.
