Nia dehan, povu hakarak vizita prezidente Repúblika nia uma hodi han hamutuk, kaer liman, moris hanesan povu baibain mak hili kandidatu Partidu KHUNTO, Armanda Berta dos Santos.  

Naimori hatutan, bainhira kandidatu ne’e manan iha eleisaun prezidensiál maka odamatan nakloke ba povu tomak atu bele ba vizita, tanba iha loron Sabadau no Domingu nia sai servisu sai hanesan povu baibain.

“Tha Timor ne’e ida ne’ebé sai prezidente halo audensia fulan ida mak ba hasoru, n’ee barak loos, mas ida be sai prezidente ohin imi bele hasoru ne’e so Berta de’it, tanba iha uma laiha eskoltu ida atu taka dalan, imi bele ba nia uma, han hamutuk hanesan  povu nia oan,” dehan nia, iha Aileu, horisehik.

Bainhira povu lakohi hili nia feen mak durante mandatu tinan lima remata mos sei povu sei la hasoru prezidente repúblika ida hodi tur han hamutuk atu  konversa maski la fó buat ruma maibé bele konsege hasoru malu ona ho prezidente.

Tau-Matan Ba Dadur

Entretantu, kandidatu Armanda Berta dos Santos, promete sei tau-matan ba dadur sira iha prizaun laran.

“Karik povu eleitu ha’u n’uudar Prezidente Repúblika maka ha’u sei fó indultu ba ita prizoneiru sira, maibé ha’u sei haree ba lei sira ne’ebé hatuur ona ita-nia Konstituisaun RDTL,” dehan nia, iha kampu Suai Ladi, Domingu (13/3).

Berta hatete, nu’udar inan ida atu sai Prezidente Repúblika prontu atu sai matan no tilun hodi rona no hatudu dalan loos hodi defende direitu tomak ba povu ninia moris di’ak.

“Tanba imi mak ohin loron ha’u hamriik iha palku ne’e, nunee ba futuru ha’u sei haree di’ak liután,” tenik nia.

Alende ne’e, Berta hateten, nu’udar xefe estadu mos iha kompetensia tomak atu haree orsamentu jerál estadu atu veta ka promulga ne’ebé karik foku liu ba dezenvonvimentu hodi hadia povu nia moris.