Kandidatu PR husi partidu PDRT ne’e hatete, PRDT iha hanoin atu halo transformasaun ida ba realidade vida atual Munisipiu Lautem nian, ne’ebé iha ligasaun forte tebtebes ba tradisaun ne’ebé sei lao ho nivel ida diferente tebes ho rai seluk-seluk, 

Lospalos, nia hatutan, koñesidu iha Timor-Leste no mós ba rai li’ur ho nia relasaun kultural ne’ebé forte.

“Portantu karik mak eleitu nuu’dar Prezidente Republika sei kontinua haburas liu tan vida atual no realidade ida ne’e, atu bele transforma vida komunidade no sosiedade Lospalos nian sai benifisiariu ba realidade moris ida ne’e nian, atu bele transforma vida povu Lospalos nian ba moris di’ak,” dehan nia liu husi Konferensia Imprensa iha sede PDRT, Dili, Domingo (13/03).

Ba kestaun turizmu nian, nia hatutan, bainhira eleitu sai nu’udar PR nia sei koalia ho governu atu bele halo tranformasaun ba modernizasaun realidade moris ida ne’e no mós eleva kapasidade no eleva nivel tradisaun nian atu bele sai fatin ba razaun atrativa ida ba turista sira, liu-liu turista lokal no internasional hodi bele ba vizita rai Lospalos.

“Bele mós halo transformasaun ida ba illa Jako ne’ebé nia bee ne’e sei moos tebtebes no bee ne’e saudavel tebes no fatin ne’e iha beleza natural ne’ebé furak,” dehan nia.

Tuir nia, fatin ne’ebé turista sira buka mak fatin ne’ebé nia beleza natural no furak.

“Nune’e, fatin ne’ebé ita-nia turista sira buka iha mundu tomak, ne’ebé nia beleza natural seidauk iha, ita bele halo transformasaun natureza ne’ebé ema buka atu atrativu tebtebes turista internasional sira,” katak nia.

Ho nune’e, kandidatu númeru sorteiu 5 ne’e haktuir, karik eleitu ba Prezidente Republika sei koalia ho governu atu bele halo no eleva tan nivel atrasaun nian, atu bele konvida sai motivu ba konvite ida ba turista internasionais sira.

“No mós iha Lospalos iha Parke boot nasaun nian mak, parke nasional Nino Konis Santana nian, ne’ebé oras ne’e dadaun konserva hela varidade espesie iha ne’ebá, animal no ai-horis sira no mós buat oioin, ne’ebé iha tinan hirak nia laran lakon tiha atensaun husi governu no ukun nain sira, atu bele hadia eleva tan nia beleza atu bele sai mós motivu ida ba nasaun nian,”haktuir Anacleto.

Tanba ne’e, hanesan Xefe Estadu sei fó atensaun espesial ba ida ne’e, atu dehan ba governu ne’ebé halo servisu turizmu nian atu tau atensaun ba realidade Lospalos nian ida ne’e.

Enkuantu, ida ne’e hanesan area espesifiku ba Lospalos nian mak ne’e kompetensia esklusivu ida ba governu hodi haree area dezenvolvimentu munisipal, dezenvolvimentu rural no dezenvolvimentu turistiku.

Maibé hanesan Prezidente Republika, dala ida tan hanesan simbolu unidade nasional ba estadu sei uza poder influensia atu dehan ba governu atu intensifikada ba area turizmu nian iha Lospalos.

Entretantu, Kandidatu númeru sorteiu 5 ne’e hatutan, bainhira eleitu nuudar Prezidente Republika sei eleva no hadia fila fali imajen Timor-Leste nian iha mundu internasional tanba, iha ukun ne’ebé mai husi 2017, TL lakon tiha kreadibilidade nasaun nian ho politika ne’ebé ho odio no vigansa, orgaun soberanu sira sai fali opozitor ba malu no impede tiha vitiza internasional barbarak ba Xefe Estadu.

Enkuantu, tama ba loron-12 kampaña eleitoral door to door, Kandidatu númeru sorteiu 5 halo deit konferensia imprensa hodi husu ba militante no apoiantes sira iha munisipiu Lautem, Postu Administrativu Lospalos atu nafatin tama uma sai uma hodi konvense eleitores tau fiar ba nia sai Xefe Estadu ba nasaun Timor-Leste.

Nia klarifika, la marka prezensa iha kampaña door to door iha Munisipiu Lautem tanba kestaun tekniku.

Tanba ne’e, nia dehan, husu ba estruruta sira tomak atu servisu makaas lori partidu nia naran atu hetan votus ba partidu nia programa no kandidatu nia programa.