Prezidente INDICA, Dinorah Granadeiro hatete, husi loron 2 Marsu bainhira kampaña hahú, INDICA rasik halo kedas monitorizasaun ba kampaña husi kandidatu sira liu-liu ba sira ne’ebé mak hetan apoiu husi partidu politiku boot, ne’ebé mak realiza kampaña iha munisipiu sira hotu.
“ Iha kampña ne’e rasik, ami identifika labarik lubuk ida mak partisipa iha kampña ne’e rasik, labarik sira ne’e mós ba ho sira nia inan-aman, maun no bin, ba sira ne’ebé mak idadade husi 15-16 ne’e balun ekipa sususe mak mobiliza hodi tuir kampaña,” dehan nia, hafoin partisipa iha komemorasaun Ezistensia Rede Feto ba dala 20 iha, edifisiu Rede Feto, Kaikoli, Sesta (11/03).
Nune’e, saída mak INDICA halo iha terenu bainhria ekipa hetan labarik sira ne’e mak, ekipa kolia ho labarik hirak ne’e no haruka fila ba uma, tanba ida ne’e la’os sira nia eventu, sira nia idade seidauk too atu ezerse sira nia direitu sivil pólitika ne’e rasik, so sira tinan 17 ba leten mak bele.
Hanoin ida ne’e, INIDIKA mós fahe brosur ba labarik sira ne’e ne’ebé hateten “bandu labarik sira partisipa iha kampaña”, iha momentu ne’e kedas labarik lubuk mak fila kedas, nune’e ami mós identifika iha labarik balun mak hatais kamizola kandidata sira nian, no ami enkoraza sira hasai.
“ Ami identifika, maioria ne’e labarik sira kiik oan mai ho idade tinan 10 mai kraik, sira mai ne’e tanba rona muzika, entau ami enkoraza sira fila ba ida-idak nia uma tanba sira sei hetan risku makaas bainhira akontese violensia ruma ba iha situasaun ida ne’e,” hatoo nia.
Nune’e identifikasaun ne’e mós INDICA identifika barak liu mai iha kampaña aberta, kampaña door too door ne’e ekipa kiik mak tama sai uma, entau hakarak ka lakoi labarik sira labele sees tanba ida ne’e sira nia hela fatin, diferensia ho kampaña iha fatin públiku.
Alende partisipasaun labarik sira nian iha kampaña, INDICA mós hareee kampaña iha munispiu balun halo rabat loos iha eskola, saída mak akontese mak, nia impaktu ne’e eskola tenke ferias, hakarak ka lakoi Diretór no mestre sira haruka estudante sira tenke fila labele eskola tanba labarik sira laiha konsentrasaun tanba larona ho sound sistem ne’ebé boot tebes.
“ Ida ne’e hotu sai ami nia preokupasaun, ho nune’e ami sei halo rekomendasaun ba CNE atu bele hareee no tau atensaun maximu ho seriu hodi hareee ba iha elisaun tinan 2023 Parlamentu Nasionál nian,” hatoo nia.
Akontesimentu ne’e rasik nia dehan, iha Munispiu Manatutu, Vikeke Vila, balun komisiu ne’e halo kedas iha eskola sira sorin, maske ne’e kampu boot , maibé ida ne’e fo impaktu ba prosesu aprendizajen labarik sira nian.
Enkuantu, Dinorah dehan, too ohin loron INDICA seidauk hetan keixa ruma liga ho vitima ba labarik sira, maske iha munispiu balun akontese duni konfrontasaun entre militante kandidatura A no militandade kandidatura B, maibé iha ne’ebé ema adultu mak sai vitima husi konfronta ne’e.
Tanba ne’e, ami sei iha relatoriu final ne’ebé sei submete ba CNE, atu nune’e bainhira kampaña tuir mai liu-liu ba iha elisaun Parlamentu Nasionál nian ne’e atu bandu makaas labele involve labarik sira.
